Ազգային շահը պետք է գերակա լինի ցանկացած քաղաքական շահի նկատմամբ. Քաղաքական գիտության Հայաստանի ասոցիացիայի կոչը
Քաղաքական գիտության Հայաստանի ասոցիացիան, խորը մտահոգություն արտահայտելով Հայաստանում տեղի ունեցող իրադարձությունների կապակցությամբ, հայտարարություն է տարածել։ Դրանում մասնավորապես ասվում է.
«Ս.թ. ապրիլի 20-ին իր ծառայողական պարտականությունները կատարելիս ՀՀ Պաշտպանության նախարարի ավտոմեքենայի վրա կատարված հարձակումը վկայում է, որ ստեղծված իրավիճակը սպառնալիք է փաստացի պատերազմական իրավիճակում գտնվող հայոց պետականությանը և կարող է նպաստավոր պայմաններ ստեղծել արտաքին միջավայրից տարբեր վնասաբեր միջամտությունների համար: Հատկապես վտանգավոր են գումարի դիմաց պետական դավաճանության դրդող կոչերը:
Քաղաքական գիտության Հայաստանի ասոցիացիան, հանդես գալով որպես քաղաքագիտության ոլորտում մասնագիտական ներուժը միավորող կառույց, իր մտահոգությունն է հայտնում հասարակության բևեռացման և խորացող հակասության առնչությամբ:
Ազգային շահը պետք է գերակա լինի ցանկացած քաղաքական շահի նկատմամբ: Քաղաքական գիտության Հայաստանի ասոցիացիան կոչ է անում անհապաղ սկսել առանց նախապայմանների բանակցություններ և առաջարկում իր մասնագիտական աջակցությունը»:
Քաղաքական գիտության Հայաստանի ասոցիացիայի խորհրդի անունից՝
Ասոցիացիայի պատվավոր նախագահ, քաղաքական գիտությունների դոկտոր, պրոֆեսոր, գեներալ-լեյտենանտ Հայկ Քոթանջյան