Fransa, Suriyedeki himiyeviy ucümni muzakere etmek içün BMT Telükesizlik Şurasını toplamağa davet etti
Fransa TİNiniñ rehberi Jan-İv Le Drian, Duma şeerinde sakinlerge qarşı yapılğan himiyeviy ucüm aqqında bildirüvler munasebeti ile «soñ derecede endişeli olğanını» bildirdi. Parijniñ noqtai-nazarına Telükesizlik Şurasınıñ sekiz devleti – Büyük Britaniya, AQŞ, Poloniya, Niderland, İsveç, Quveyt, Peru ve Kot-d’İvuar qol tuttılar.
Fransa TİNiniñ rehberi Dumadaki vaqialarğa «nefret doğurğan halqara hümanitar uquqnıñ bozuluvı» dedi. Le Driannıñ sözlerine köre, Fransa ittifaqdaşlarnen beraber, himiyeviy silâ kerçekten de qullanıldımı, tayin etecek.
Bazar künü Suriyede, bunıñ arfesinde, aprel 7-de Şarqiy Guta bölgesinde isyancılarnıñ qolunda olğan Dimaşq yanındaki qısmına qarşı yapılğan himiyeviy ucüm qurbanlarınıñ sayısı aqqında yañı malümatnı bildirdiler.
Farqlı bildirüvlerge köre, onlarca qurbanlarından baas etile – 40-tan 70-ke qadar. Bu raqamlarnı «Beyaz miğferler» adınen belli olğan Suriye vatandaşlar mudafaası teşkilâtı bildire. Elâk olğanlarda himiyeviy silâ qullanılmasınıñ alâmetleri bar – kenişlegen köz bebekleri ve ağızdan çıqqan köpük.
Duma şeerindeki himiyeviy ucümniñ neticesinde zarar körgenlerniñ sayısı – yüzlernen kişi.
AQŞta daa aprel 7-de, himiyeviy ucüminden aman soñra, Vaşingtonnıñ, Suriye ukümet quvetleri tarafından himyeviy silâ qullanılmasınıñ yañı bir deşetli adisesi aqqında pek endişeli haberlerni diqqatnen taqip etkenini bildirdiler. AQŞ Devlet departamentiniñ beyanatında bildirilgenine köre, Suriye ukümetine qatiyen qol tutqan Rusiyeniñ bunıñ içün esas mesüliyeti bardır.
Devlet departamentinde: «Rejim tarafından öz halqına qarşı himiyeviy silânıñ qullanılması tarihı iç şübhe doğurmaz», – dep ilâve ettiler.
Suriye ukümeti ve onıñ ittifaqdaşı Rusiye bu bildirüvni sahte deyler.