Ակնկալում ենք, որ միջազգային հանրությունը խորապես կընկալի իրավիճակն ու որոշակի քայլեր կձեռնարկի. ԱՀ ՄԻՊ–ը` Ադրբեջանական վայրագությունների վերաբերյալ զեկույցի մասին
ԼՂՀ մարդու իրավունքների պաշտպան Ռուբեն Մելիքյանը ապրիլյան պատերազմի տարելիցի նախօրեին Tert.am-ի հետ զրույցում անդրադարձավ ապրիլյան պատերազմի ժամանակ ադրբեջանական զինված ուժերի կողմից թույլ տրված մարդու իրավունքների խախտումների և վայրագությունների վերաբերյալ Արցախի ՄԻՊ-ի վերջնական զեկույցի ընթացքին:
«Բովանդակությանը չեմ ուզում այս պահին անդրադառնալ, կառուցվածքի մասին խոսեմ, որն իրենից ներկայացնում է փաստական տվյալների և իրավական գնահատականների համակցություն, որը ես շատ կարևորում եմ: Ըստ էության՝ զեկույցում ներկայացված բոլոր փաստերի ճնշող մեծամասնությունը ժամանակին քննարկվել է մեր մամուլով, և դրանք բոլորն էլ բաց աղբյուրներից են՝ բացառությամբ կրթական համակարգին վերաբերող հատվածի, որն ըստ էության, նույնպես ժամանակին ձևակերպված եղել է: Այսինքն՝ մեզ համար սենսացիոն բաներ չեմ կարծում, որ կլինեն՝ հաշվի առնելով այն հանգամանքը, որ հայկական հանրությունն իրականում պատկերացնում է, թե ինչ է կատարվում Ադրբեջանում: Այսինքն՝ սա առաջին հերթին միջազգային հանրության համար է նախատեսված, և անգլերենով է»,- ասաց Մելիքյանը:
Ըստ Ռուբեն Մելիքյանի՝ ունենք ընկալում, որ միջազգային հանրությունը պատշաճ պատկերացում չունի Ադրբեջանում տիրող իրավիճակի մասին: «Սա այն շարքերից մեկը կարող է լինել, որ մենք այդ ընկալումը ապահովենք միջազգային` հատկապես իրավապաշտպան հանրության շրջանում»,-ասաց նա:
ԼՂՀ մարդու իրավունքների պաշտպանը նշեց, թե բավականին մեծ ծավալի աշխատանքի մասին է խոսքը: «Բավականին մեծ թվով մարդիկ են ներգրավված. ամեն ինչն էլ, երևի, կարելի էր ավելի վաղ անել, սակայն մենք բազմաթիվ այլ պարտականություններ ունենք և հասցնում ենք հիմա»,-ասաց նա և հավելեց, , որ այն տարածելու համար լինելու են այցելություններ, և ինչպես նախորդ անգամ, այնպես էլ այս անգամ կգտնվեն գործընկերներ, ովքեր կօժանդակեն՝ սփյուռքի գործընկերներ, հանրային մարմիններ և այլն:
«Մենք կարծում ենք, որ տեղ հասցնելու և անհրաժեշտ կազմակերպությունների սեղանին դնելու ուղղությամբ խնդիրներ չենք ունենալու, սակայն դա չի նշանակում, որ մեր խնդիրը դրանով ավարտված է լինելու: Սա տևական աշխատանք է պահանջում։ Մենք ակնկալում ենք, որ միջազգային իրավապաշտպան հանրությունում իրավիճակը և խնդիրը խորապես կընկալվի, դա է այն նպատակը, որ մեր առաջ դրել ենք: Մենք հեռու ենք այն մտքից, որ ինչ-որ մի զեկույցով հնարավոր է փոփոխություն մտցնել Ադրբեջանում քաղաքականության առումով, սակայն մենք կարծում ենք, որ միջազգային հանրության կողմից դրա ընկալման դեպքում և որպես հաջորդ քայլ` համարժեք արձագանքման դեպքում որոշակի փոփոխություններ հնարավոր են»,-ասաց նա:
Ինչ վերաբերում է իրավական պատասխանատվության հարց բարձրացնելուն, ապա Մելիքյանը նշեց, որ իրենք չունեն պատասխանատվության հարց բարձրացնելու իրավասությունը: «Սա չէ առաջնայինը, այլ խնդիրը բարձրաձայնելը և դա տեղ հասցնելը»,-ասաց նա:
Դիտարկմանը, թե շատ կա քննադատություն, որ հայկական կողմը չի կարողանում քարոզչական մակարդակում եղածը ներկայացնել, իսկ Ադրբեջանը իր չեղած փաստերն է քննարկման առիթ դարձնում, Արցախի ՄԻՊ-ն ասաց.«Ես կարծում եմ, որ մենք պետք է մշտապես փորձենք ավելին անել, քան անում ենք և առաջին հերթին դա վերաբերում է իմ կողմից գլխավորած հաստատությանը»:
Հարցին, թե արդյոք Հայաստանի բացթողումը չէ՞, որ մինչ այս պատշաճ չի ներկայացրել և այս հարցում Ադրբեջանն է առաջ անցել, նա պատասխանեց.«Դուք գնահատականներ եք տալիս, որոնք շատ վիճելի են, դժվար է ասել` ով է որտեղից առաջ անցել, այստեղ մրցամարտ չէ, որտեղ մենք կարողանանք հաշվել, թե ով քանի գոլ խփեց և դրանով հետևություններ անել, բոլորվին այլ իրավիճակ է. մենք ունենք մեր գործիքները, Ադրբեջանն ունի իր գործիքները, մենք ունենք մեր առավելությունները, Ադրբեջանն` իր: Ես այդպես այդ հարցը չէի դնի»: