ԱԺ–ում շարունակվում է Կառավարության հետ հարցուպատասխանը (ուղիղ)
Կառավարության հետ հարցուպատասխանի ժամանակ ԱԺ «Ելք» խմբակցության անդամ Էդմոն Մարուքյանը մինչ հարց կուղղեր, հիշեցրեց, որ վարչապետ Կարեն Կարապետյանը Լիբանանում գործատուների հետ հանդիպման ժամանակ խոսում էր ՀՀ-ում ներդրումներից, սակայն Հայաստանում գործարարների շահերը պաշտպանող կազմակերպությունների ներկայացուցիչները հարցազրույցներ են տալիս ու հայտարարում, որ փոքր ու միջին ձեռնարկությունները շնչահեղձ են լինում, մահանում են:
Ըստ Մարուքյանի՝ նույնիսկ դեպք կա միջազգային դատարանում՝ ՀՀ-ում ներդրողին «գցելու» համար:
Ընդդիմադիր պատգամավորը մյուս կողմից էլ նկատեց, թե շատ բիզնեսմենների վրա ազդում է քաղաքական անկայունության հարցը, թե երկրում ով է լինելու վարչապետ, ինչը, ըստ Մարուքյանի, նաև Կարեն Կարապետյանի հարցազրույցներում է արծարծվել:
Վարչապետ Կարեն Կարապետյանը պատասխանեց, որ իր ասածի մեջ հակասություն չկա, չեն ասում, որ բոլոր խնդիրները լուծել են: «Սակայն վիճակագրությունը ցույց է տալիս, որ ՓՄՁ-ն աճել է, մենք հստակ գիտենք՝ ինչն ենք փոխել, ինչ խնդիրներ կան: Ինչ վերաբերում է կայունությանը, մեր խնդիրն է այնպիսի համակարգ ստեղծել, որ անձից կախված բիզնեսի անդրադարձները, վստահությունը չպակասեն»,-ասաց նա:
Մարուքյանն արձագանքեց, որ եթե գործարար միջավայրի սպասումների վրա վարչապետի նշանակման անորոշությունն էր ազդում, ապա հիմա, կարծես թե, այդ խնդիրն այլևս չկա, ապա այս ենթատեքստում հարցրեց՝ ի՞նչ կարծիքի է հիմա, երբ ակնհայտ է, որ նա առաջին փոխվարչապետ է աշխատելու:
«Իմ պատասխանը կրկնեմ. ես ընդունում եմ, որ բիզնեսմեններ կան, որ դրա վրա արձագանքում են»,-նշեց Կարապետյանը:
Իսկ փոխվարչապետի հարցի վերաբերյալ նա ասաց. «Դրա մասին քննարկում եղե՞լ է, որ ասեմ՝ պատրաստ եմ, թե չէ»:
Մարուքյանը տեղից արձագանեց, ինչը լսելի չէր, իսկ վարչապետը շարունակեց. «Հարց եք տվել` պատրաստ ե՞ք, թե չէ, ասել եմ հա, էդ քննարկումը դեռ չկա»: