Նա նախ պետք է որպես պաշտպանության նախարար կայանա. Խոսրով Հարությունյանը՝ վարչապետի պաշտոնում Վիգեն Սարգսյանի թեկնածության մասին
Չեմ կարծում, որ կան անփոխարինելի մարդիկ ընդհանրապես, բայց եթե կոնկրետ տվյալ իրավիճակում նայում ենք հանրապետության վարչապետին, սահմանադրորեն այդ պաշտոնյային վերապահված պատասխանատվությունները, ապա դրանք արդյունավետ իրացնելու առումով ունակություն, փորձառություն, հմտություն, գիտելիք, կարողություններ ունեցող շատ քչերը կան, որ կարող են հավակնել նման պատասխանատվության: Իսկ Հայաստանի Հանրապետական կուսակցության շրջանակում, ես կարծում եմ, կարող է լինել միայն մեկը: Այս մասին ԱԺ «Հայաստանի Հանրապետական կուսակցություն» խմբակցության անդամ Խոսրով Հարությունյանն ասել է «Շանթ» հեռուստաընկերության եթերում:
Նա, անդրադառնալով այն դիտարկմանը, թե Սահմանադրությունը փոխվեց նրա համար, որ երկրի ղեկավարը մնա Սերժ Սարգսյանը, պատասխանել է. «Խորհրդարանական կառավարման համակարգի ամբողջ կարևորությունը վարչապետի պաշտոնը չէ: Հավատացնում եմ, խորհրդարանական կառավարման համակարգը որակապես նոր, ինքնակառավարման և ինստիտուտ կուսակցությունների ձևավորման համար նախադրյալներ է ստեղծում, ընդ որում՝ անշրջելի իրավական քաղաքական նախադրյալներ: Մեր հանրային ու քաղաքական կյանքը եթե կաղում էր, ապա նախևառաջ այն պատճառով, որ մենք իրականում չունենք քաղաքական կուսակցություններ, որոնք ունակ են իրենց ընդերքում ձևավորել լուրջ, քաղաքական որոշումներ կայացնելու ունակ քաղաքական գործիչների զանգված, այսինքն՝ կուսակցություններ, որոնք կարող էին դառնալ քաղաքական գործիչների որոնման դարբնոց: Այսօր դրա համար շատ լուրջ նախադրյալներ են ստեղծվում, այդ թվում՝ սահմանադրական: Այնպես որ, ես կարծում եմ՝ հիմնական նպատակը դա է եղել՝ նոր բովանդակություն հաղորդելը քաղաքական համակարգին»:
ՀՀԿ պատգամավորի խոսքով՝ հիմա խոսքն այնպիսի քաղաքական համակարգի մասին է, որն իր էությամբ ենթադրում է քաղաքական կուսակցությունների՝ հանրային կյանքի ընդգծված պատասխանատվություն, ընդ որում, այդ պատասխանատվության ռեալ իրականացնողն ընտրությունների ժամանակ, նախընտրական մրցապայքարում, կուսակցությունների խոստումների իրական կատարողը մնում է կառավարությունը՝ ի դեմ վարչապետի:
Հիշեցնենք, որ Tert.am-ին տված հարցազրույցում ՀՀ Նախագահն ասել էր. «Եթե ի վերջո որոշենք, որ առաջադրվելու է իմ թեկնածությունը, ապա դա կլինի իմ կողմից մեկ հավելումով ՝ առ այն, որ սահմանադրական լիազորությունների ամբողջական իրականացմանը զուգահեռ ավելի շատ ժամանակ եմ հատկացնելու երիտասարդ քաղաքական լիդերներին մեր երկրի անցած տարիների երևացող ու չերևացող ողջ փորձը փոխանցելու գործին»։
Անդրադառնալով այս հայտարարությանը՝ Խոսրով Հարությունյանն ասել է. «Փորձեք մտովի վերհիշել այսօրվա մեր փոխնախարարներին՝ գյուղատնտեսության, կրթության, էկոնոմիկայի, ֆինանսների, ամեն տեղ, ուշադրություն դարձրեք, նրանք որակյալ, ժամանակակից կրթություն ստացած, մեծ մասը մի քանի լեզու տիրապետող երիտասարդներ են: Այսինքն՝ այդ երիտասարդացման պրոցեսն արդեն սկսվել է: Խոսքը մի քիչ այլ բանի մասին է: Այդ երիտասարդները քաղաքական փորձառություն ձեռք բերելու լրջագույն խնդիր ունեն, որպեսզի նրանցից ոմանք վաղը, մյուս օրը հայտնվեն նախարարի կամ ավելի բարձր պաշտոններում: Ես կարծում եմ՝ նախագահը նկատի ունի իր որդեգրած քաղաքականության տրամաբանական շարունակությունն առաջիկայում:
Հարցին, թե ինչու Վիգեն Սարգսյանը չի առաջադրվի ՀՀԿ-ի կողմից որպես վարչապետի թեկնածու, ՀՀԿ պատգամավորի կարծիքով՝ եթե Վիգեն Սարգսյանին հարցնեն՝ նա շատ հստակ պատասխան կտա:
«Նախ, նա պետք է որպես պաշտպանության նախարար կայանա: Ես ողջունում եմ իր բոլոր նախաձեռնությունները, որովհետև մենք ունենք որակապես նոր պաշտպանության նախարար: Բայց այն աշխարհաքաղաքական բարդ իրավիճակում, որ գտնվում է Հայաստանը, գնալ այսրոպեական լուծումների, կլինի մի քիչ նույնիսկ ռիսկային: Վիգեն Սարգսյանն ապագայի ամենախոստումնալից, քաղաքական պատասխանատու դերակատարում ստանձնած, ունակ կադրերից մեկն է, ես դա չեմ բացառում, նույնիսկ համոզված եմ, որ դա այդպես կլինի, բայց համաձայնեք, որ միանգամից այդպիսի մեծ պատասխանատվության տակ մտնելը պահանջում է բավականին լուրջ փորձառություն»,-եզրափակել է Խոսրով Հարությունյանը: