Trump Səudiyyə şahzadəsiylə görüşüb
Şahzadəylə Trump-ın İranla nüvə sazişində “qüsurlar”ı, İranın Yaxın Şərqdəki münaqişələrdə rolunun önlənməsini müzakirə etdikləri xəbər verilir.
“Nə baş verəcəyini görəcəyik”, – Trump nüvə sazişinin dəyişdirilməsi, yaxud ondan çıxmaqla bağlı suala cavabında deyib.
“İran dünyanın o hissəsində uyğun şəkildə davranmır. İranda çox pis şeylər baş verir. Bir aya sazişə baxılacaq və nə baş verəcəyini görəcəyik”, – Trump bildirib.
ABŞ prezidenti nüvə sazişindən çıxmaqla hədələyib. Avropalı müttəfiqləri və ABŞ Konqresi qarşısında şərt qoyub ki, mayın 12-dək sənəddəki “fəlakətli qüsurlar”ı yoluna qoymağa razılaşsınlar, İranın ballistik nüvə raketi hazırlamasına, regional münaqişələrdə iştirakına yeni məhdudiyyətlər qoysunlar.
Tehran regionda münaqişələrə müdaxiləylə bağlı ittihamları rədd edir, Trump-ın nüvə razılaşmasına dəyişikliklər tələbinə qarşı çıxır.