Hersondan Qırım ile memuriy sıñırğa qadar qoşumça eki tren yiberildi – Babin
Martnıñ 1-nden başlap Hersondan Qırım ile memuriy sıñırdan 10 km uzaqlıqta bulunğan Vadim stantsiyasına qadar eki şeer etrafı treni qatnay. Bunı Qırım.Aqiqatqa QMCde Ukraina prezidentiniñ temsilcisi Boris Babin bildirdi.
Babin: «Bugün çalışıp başlağan bu şeer etrafı treni, asılında keçit devri usulıdır. O, ayrıca, Qırım sakinleri içün çalışacaq. Çünki o suratlı, daa komfortlı em de Kyiv ve Harkiv trenleriniñ grafiklerinen uyğunlaştırıldı», – dep bildirdi.
«Herson – Vadim» treni er kün 9.13 ve 14.14-te yolğa çıqa. Qaytuv yönelişinde: 11.44 ve 16.45-te. Qatnav grafigine köre, yolda keçecek vaqıt 2 saat 5 daqiqanı teşkil ete.
Herson demiryor vokzalınıñ malümat bürosında Qırım.Aqiqat muhbirine, yol ucreti 25 qadar hrivna olğanını bildirdiler.
Babinniñ aytqanına köre, martnıñ ortasından başlap Vadim stantsiyasından «Çaplinka» Kiriş-çıqış kontrol noqtasına qadar qatnaycaq resmiy avtobuslar ve taksiler teşkil olunacaqlar.
Qırımnıñ Rusiye tarafından ilhaqı munasebeti ile 2014 senesi dekabrniñ 27-sinden başlap «Ukrzaliznıtsâ», telükesizlikni temin etmek maqsadınen Qırım ile demiryol alâqasını kestirdi ve yarımadağ qatnağan halqara trenlerini lâğu etti. Qırım doğrultısında qatnağan trenler yalıñız Novoalekseevka ve Hersonğa qadar bara ediler.
2014 senesiniñ başında Qırım Rusiye tarafından ilhaq etilgen soñ Ukrainanıñ qıtadaki qısmı ile yarımada arasında şeklen memuriy, lâkin kerçekte aqiqiy olğan sıñır keçti. Herson vilâyetinde Qırım ile memuriy sıñırda üç kiriş/çıqış kontrol noqtası çalışa – «Kalançak», «Çonğar» ve «Çaplinka».
Halqara teşkilâtlar Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalarnı tatbiq etti. Rusiye, yarımadanı işğal etkenini red etip, buña «tarihiy adaletniñ tiklenüvi», dey. Ukrainanıñ Yuqarı Radası 2014 senesi fevralniñ 20-sini, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.