Poroşenko: QMC Yuqarı Radasınıñ 2014 senesi martında Qırımda «referendum»nı ilân etmege salâhiyeti yoq edi
Poroşenko: «Astını sızıp aytam: Qırım Yuqarı Radasınıñ sözde referendumnı ilân etmege iç bir salâhiyeti olmağanına rağmen, iç bir referendum ilân etilmey edi. Künniñ tayin etilüvi ile ayın-oyunlar – başta fevral 21, soñ mart 16 künü – Rusiye akimiyeti tarafından yapılğan areketlerniñ aşıqıp ve qanunsız yapılğanını tasdiqlaylar. Olar böyle etip Rusiyeniñ areketlerini qanuniyleştirecek ediler», – dedi.
Ondan ğayrı o, Qırımda o vaqıt vaziyet «pek kergin edi», onı Rusiyeniñ mahsus hizmetleri kontrol ete ediler, dep qayd etti.
Ukraina prezidenti: «Bu adımlarnıñ koordinatsiyası ve bunıñnen beraber Rusiye prezidenti Putinniñ Rusiye arbiylerini devlet sıñırı tışında qullanuv aqqında qararı, Silâlı quvetlerniñ qullanılması boyunca Rusiye Federatsiya Şurasına muracaat ve ondan ğayrı Federatsiya Şurasınıñ pek acele qabul etilgen qararı, Rusiye parlamenti ve prezidentiniñ, qanunsız ilhaqını temin etmek içün Qırımda bulunğan arbiy hadimler ve kiralı askerler ile pek yahşı etip koordinirlengen areketleri aqqında şaatlıq eteler», – dedi.
Fevralniñ 18-nde Poroşenko, sabıq prezident Yanukoviçniñ devletke hiyanetlikte qabaatlavlarına dair cinaiy işniñ baqılması boyunca mahkeme oturışuvında iştirak etecegini bildirdi.
2014 senesiniñ fevralinde Poroşenko, Ukraina halq deputatı sıfatında, Qırım parlamentiniñ deputatlarınen muzakereler yapmaq içün uçaqnen Qırımğa keldi. Aqmescit ava limanınıñ çıqışında silâlı «özüni mudafaanıñ uruşmacıları» Poroşenkonıñ yardımcılarını toqtatacaq oldılar, lâkin bu teşebbüs netice bermedi. Daa soñra kelecekteki Ukraina prezidenti QMC Yuqarı Radasına yol aldı. Anda, basamaqlarda, qalabalıq oña ıslıq çaldı. Muzakereler ise iç bir netice bermedi.
Obolonskıy rayon mahkemesi 2017 senesi iyünniñ soñunda Ukrainanıñ sabıq prezidenti Viktor Yanukoviçniñ devletke hiyanetlik etkeninde qabaatlavları boyunca işni ğiyabiy şekilde baqıp başladı. Meydandaki vaqialar ayrı bir iş boyunca baqılalar.
Meydanda adamlar atıp öldürilgen soñ Rusiyege qaçqan Ukrainanıñ sabıq prezidenti Viktor Yanukoviç bütün qabaatlavlarnı red ete.