Պետք է ամեն ինչ անենք, որ հաջորդ ընտրությունները տեղի չունենան ռեյտինգային ընտրակարգով. Է. Մարուքյան
Այն ուժերը, որոնք կոնսենսուսով ընդունել են ընտրական օրենսգիրքը կա՛մ չեն անցել խորհրդարան, կա՛մ դեմ են այս օրենսգրքին, ինչը պարզվեց նախորդ նիստից: Այս մասին Ազգային ժողովի Պետաիրավական հարցերի հանձնաժողովի նիստում քննարկման ժամանակ ասաց «Ելք» խմբակցության պատգամավոր Էդմոն Մարուքյանը:
«Այսինքն՝ ԲՀԿ-ը, որ կոնսենսուսի մեջ է եղել, հիմա ուզում է, որ փոխվի, դեմ է, ՀՅԴ-ն ուզում է, որ փոխվի, դեմ է, և միայն ՀՀԿ-ն է կոնսենսուսի ուժերից, որ ասում է՝ սա լավ օրենք է : Ուրեմն ես չգիտեմ մեկ այլ քաղաքական գործիչ կամ պատգամավոր, որ այդքան շատ դեմ արտահայտված լինի այս ռեյտինգային համակարգի վերաբերյալ, որքան որ ես եմ խոսել՝ մանրամասն դետալներով: Ես ասում էի, որ ցուցակների հրապարակումը և տեսանկարահանումը որևէ էֆեկտ չի տալու, որովհետև այս ընտրակարգով մի հրեշավոր բան է արվում»,- ասաց Մարուքյանը՝ նշելով, որ մեծամասնական ընտրակարգից ավելի վատ ընտրակարգ դրվեց:
Ըստ պատգամավորի՝ եթե մեծամասնական ընտրակարգի դեպքում 131-ից 41-ն էին մեծամասնականով ընդունվում, 90-ը համամասնականով, ապա հիմա 105 պատգամավորների կեսն ընտրվում է ռեյտինգային ընտրակարգով:
«Ինչի մասին է ռեյտինգային ընտրակարգը. դա մի ընտրակարգ է, որտեղ ոչ թե քաղաքական ուժերի բրենդերն են մրցակցում, որտեղ ոչ թե քաղաքական ուժերի գաղափարները, պլատֆորմը, տեսլականներն են մրցակցում, այլ մրցակցում են տարածքներում ինչ-որ մարդիկ, ովքեր ով ինչքան փող ուներ, ինչքան հնարավորություն ուներ մարդկանց դուրս հանելու տարբեր ահաբեկչական մեթոդաբանությամբ կամ վարչական տարբեր մեթոդներով, դա իրականացրեց, և դրա արդյունքում ունենք հիմա այս վիճակը»,- ասաց Մարուքյանը:
Նա նշեց, որ խորհրդարան անցած ուժերից ամենից շատ համամասնական ձայներ ստացած ուժը «Ելք»-ն է, մնացած ուժերը ռեյտինգայինից են ձայներ ստացել:
«Մեր Փիլիպոսին կընտրես, ասում է՝ հա, ես զզվում եմ ձեր քաղաքական միավորից, հա բայց դու Փիլիպոսի հետ լավ ես չէ, լավ տղա ա Փիլիպոսը, դե գնա դու Փիլիպոսին ընտրի, ախպե՛ր, ու տենց ձայները հավաքվում են»,- ասաց պատգամավորը:
Նա հիշեցրեց, որ ԸՕ-ի շուրջ կոնսենսուսի մեջ, դեռ այն ժամանակ էլ, երբ «Ելք» դաշինքը ձևավորված չէր, չեն մտել ո՛չ ինքը, ո՛չ Նիկոլ Փաշինյանը՝ ի սկզբանե դեմ արտահայտվելով այդ համակարգին, որին մինչև հիմա էլ դեմ են:
Մարուքյանի խոսքով՝ ընտրական օրենսգրքի ներկայիս համակարգը քաղաքական համակարգ չէ:
Նա նշեց, որ պարզ է՝ այսօր բերված փոփոխությունները չեն ընդունվի, իսկ եթե հետագայում սկսվեն քննարկումներ ԸՕ-ի շուրջ, «Ելք»-ը ակտիվորեն կներգրավվի:
«Եթե մի օր պահը գա, որ սկսվեն քաղաքական բանակցություններ, մենք անպայման դրա մեջ կլինենք, մեր ներդրումը կունենանք և, բնականաբար, պետք է ամեն ինչ անենք, որ հաջորդ ընտրություններն այս ռեյտինգային համակարգով տեղի չունենան»,- եզրափակեց Մարուքյանը: