«Ժողովուրդ». Կառավարությունն օրերս կվավերացնի հերթական վարկային համաձայնագիրը
«Կառավարությունը մոտ օրերս կվավերացնի ՀՀ-ի և Վերակառուցման և զարգացման միջազգային բանկի միջև անցած տարվա նոյեմբերի 20-ին ստորագրված «Ոռոգման համակարգերի բարելավման ծրագրի համար լրացուցիչ ֆինանսավորում» վարկային համաձայնագիրը:
«Ժողովուրդ» օրաթերթին հայտնի դարձավ, որ հատկացվող վարկի գումարը կազմում է 2 մլն դոլար, որի մայր գումարի վճարումը սկսվելու է 2032 թվականի մայիսի 15-ից մինչև 2042 թվականի նոյեմբերի 15-ը: Սա դեռ լրացուցիչ ֆինանսավորումն է: Հիշեցնենք, որ միայն 2011 թվականին նույն նպատակի համար ՎԶԵԲ-ից ՀՀ-ն 18 մլն դոլարի չափով վարկ էր վերցրել:
Նկատենք, որ վերջին տարիներին ՀՀ կառավարությունը ոռոգման համակարգի արդիականացման, ջրամբարների կառուցման ու վերանորոգման համար հսկայական վարկեր է վերցրել: Փաստացի, Հայաստանն արդեն իսկ ստացել է 50 մլն եվրո և 48 միլիոն դոլար՝ ոռոգման ցանցը բարելավելու համար, նախատեսվում են ևս հսկայական միջոցներ»,-գրում է թերթը:
Նյութն ամբողջությամբ կարդացեք թերթի այսօրվա համարում: