QMC prokuraturası Qırım sakinlerini Rusiye ordusına çağırıluv vaqiaları aqqında bildirmege rica ete

Qırım Muhtar Cumhuriyeti prokuraturası Qırım sakinlerini, Rusiye ordusında hizmet etmek içün povestka almaları taqdirde telefon ya da elektron poçta vastasınen muracaat etmege rica ete. Bunı yanvarniñ 11-nde nezaret muessiseniñ matbuat hizmeti bildire.


Prokuraturada, bizim taraftan «Rusiye ordusında arbiy hizmetniñ keçirilmesine mecbur etüv, arbiy komissariatlar tarafından sakinlerge munasip povestkalar yollav ve, ondan ğayrı, Rusiye ordusında hizmet etmekniñ red etilmesi içün cinaiy işlerniñ  açuv ya da başqa şekilde cevapkârlıqqa celp etüv vaqiaları boyunca yapılğan tahqiqat işlerinde protsessual rehberlik yapıla», dep hatırlatalar.


Muessisede, (044) 569-73-57 telefonı ve (zvern01@ark.gp.gov.ua) elektron poçtası ya da Kyivdeki (Delovaya soqağı, 24) adresi boyunca Qırım sakinleriniñ Rusiye ordusında arbiy hizmet etmege mecbur etüv vaqiaları aqqında şikâyetlerini beklegenlerini añlattılar.


Bunıñ arfesinde Qırım Muhtar Cumhuriyeti prokuraturasında Qırım.Aqiqatqa, Qırım sakinlerini Rusiye ordusında hizmet etmege mecbur etüv vaqiaları boyunca deliller toplağanlarını bildirdiler. Bu «arbiy cinayet olıp, oña Halqara cinaiy mahkemeniñ yurisdiktsiyası kenişletile».


Qırım aq-uquq qorçalayıcıları grubu, üç yıl zarfında Rusiyeniñ ordusına 10 biñge yaqın Qırım sakini çağırıldı, dep iddia ete.


Qırımnıñ ilhaqından soñ Rusiye akimiyeti Qırım sakinlerini öz ordusınıñ saflarına askerlikke alalar. Yarımadada bir çoq kütleviy tedbirlerde Rusiye Silâlı quvetlerinde hizmet etüv teşviqatı yapıla. Halqara qanunları ve BMT Baş Assambleyasınıñ qararlarına baqmadan Qırım sakinlerini Rusiye ordusına hizmetke kirmege davet eteler.