Çubarov Almaniya MİDiniñ yolbaşçısını sanktsiyalarnı lâğu eterek «tecavuzcını rağbetlendirmemege» rica ete
«Almaniya tış işleri naziri Sigmar Gabriel, eger Rusiye Donbassta «mavı kaskalarnıñ» bulunmasına musaade etse, o zaman «buña qarşılıq olaraq oña bir şey bermek kerek, bir şeynen mukâfatlandırmaq kerek» deyerek, Avropa sanktsiyalarınıñ qısmen lâğu etilüvi nazarda tuta. Unutqanlarğa, Hitler ve Stalinniñ avtoritar rejimleri rağbetlendirilüvi neticesinde XX asırda onlarca million insannıñ öldürülmesi şeklindeki felâketine sebep olğanını hatırlatmaq yerli olur, dep belleyim», – dep yaza Çubarov.
Onıñ sözlerine köre, ««tecavuzcınıñ rağbetlendirilüvi – onıñ cinayetlerine ortaqlıq yapuvnıñ hususiy bir şeklidir».
Yanvarniñ 10-nda KHV peyda olğan malümatqa köre, Almaniya tış işleri naziri Sigmar Gabriel Avropa Birligine Ukrainanıñ şarqında uzun müddetke ateş toqtatılğan taqdirde, Rusiyege qarşı sanktsiyalarnı basmaq-basamaq lâğu etmege başlamasını teklif etken edi.
Rusiyege qarşı sanktsiyalarnıñ basmaq-basamaq lâğu etilmesinen bağlı teklifni Gabriel ilk sefer yapmamaqtadır. 2017 senesi mart ayında o, Rusiye Minsk anlaşmalarınıñ becerilmesinde bir ilerileme kösterse, sanktsiyalar basamaq-basamaq lâğu etilir degen edi.
Şimdi ABniñ Rusiyege nisbeten kirsetken sanktsiyalarnen bağlı resmiy siyaseti, Ukrainanıñ şarqındaki Moskva tecavuzınen bağlı sıñırlavlar ancaq Rusiyeniñ Minsk añlaşmalarını bütünley becergeninden soñ, Qırımnen bağlı olaraq kirsetilgen soylârı ise – yarımada tamamile azat etilgen soñ lâğu etilebilecek.
Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqit etti. Ğarp memleketleri bir sıra iqtisadiy sanktsiyalar kirsetti. Rusiye yarımada ilhaqını inkâr etip, buña «tarihiy adaletniñ tiklenmesi» dey. Ukraina Yuqarı Radası 2014 senesi fevral ayınıñ 20-sini Rusiye tarafından Qırımnıñ muvaqqat işğaliniñ resmiy başlanğıç künü dep ilân etti.