Եթե բուժաշխատողը գնում է պոլիկլինիկա, մեկը իր ձեռքը բռնեց՝ դա մասնագիտական գործունեությանը խոչընդո՞տ է. Գ. Կոստանյանը դեմ է օրենքից մասնագիտական բառը հանելուն
ԱԺ պետական-իրավական և մարդու իրավունքների պաշտպանության մշտական հանձնաժողովի նիստում 2-րդ ընթերցմամբ քննարկվեց «ՀՀ քրեական օրենսգրքում փոփոխությունների» նախագիծը, որով առաջարկվում է բուժաշխատողների մասնագիտական գործունեությանը խոչընդոտելու համար պատիժ սահմանել: Նախագծի հեղինակներն են ԱԺ «Հայաստանի Հանրապետական կուսակցություն» խմբակցության պատգամավորներ Հրայր Թովմասյանն ու Կարեն Ավագյանը:
Նախագծի հեղինակները ներկայացրեցին, որ օրենքի նախագծով առաջարկվում է բուժաշխատողների մասնագիտական գործունեությունը խոչընդոտելու համար պատիժ սահմանել, այսինքն, եթե բուժաշխատողի մասնագիտական գործունեությանը խոչընդոտում են այնպես, որ դա կատարվում է նրա նկատմամբ կյանքի կամ առողջության համար ոչ վտանգավոր բռնություն գործադրելով կամ բռնություն գործադրելու սպառնալիքով` պատժվում է տուգանքով` նվազագույն աշխատավարձի 300-ապատիկից 500-ապատիկի չափով:
Իսկ բուժաշխատողի մասնագիտական գործունեությանը խոչընդոտելը, որը կատարվել է նրա նկատմամբ կյանքի կամ առողջության համար վտանգավոր բռնություն գործադրելով կամ դա գործադրելու սպառնալիքով, պատժվում է կալանքով՝ 1-2 ամիս ժամկետով կամ ազատազրկմամբ՝ 2-5 տարի ժամկետով:
Օրենքի նախագծի հետ կապված առաջարկներ էին եղել, որոնցից մեկը վերաբերում էր «մասնագիտական գործունեությունը» չգրելուն՝ հանելով մասնագիտական բառը: Սակայն այս առաջարկը չողջունվեց հանձնաժողովի անդամների կողմից: Այս գաղափարին դեմ արտահայտվեց ԱԺ փոխխոսնակ, արդարադատության նախկին նախարար Արփինե Հովհաննիսյանը: Վերջինս վկայակոչեց փաստաբանների, լրագրողների մասին համանման դրույթները, որտեղ կա մասնագիտական բառը:
Հովհաննիսյանի հետ համակարծիք էր ԱԺ ՀՀԿ խմբակցության պատգամավոր, նախկին գլխավոր դատախազ Գևորգ Կոստանյանը. նա պնդեց, որ մասնագիտական բառը պետք է մնա:
«Մի իրավակիրառող էլ ես եմ եղել, ես ինքս եմ որոշում իրավակիրառությունը նմանատիպ նորմերի: Մենք պետք է գնահատենք՝ որ պահից սկսեց հանցակազմը, որ պահից ավարտվեց: Երբ բուժաշխատողը առավոտ զարթնեց, գնում է պոլիկլինիկա՝ աշխատանքի, արդյոք դա իր մասնագիտական գործունեությո՞ւնն է, որ էդ պահին, երբ մեկը իր ձեռքը բռնեց, ասաց՝ մի՛ գնա, ասենք մասնագիտական գործունեությունը խոչընդոտե՞ց, դա իր մասնագիտական գործունեությանը խոչընդո՞տ է: Մենք պետք է գնահատենք՝ որ պահին է իր մասնագիտական գործունեությունը սկսում»,-ասաց նա:
Ի վերջո հանձնաժողովի անդամները քվեարկությամբ որոշեցին, որ «մասնագիտական գործություն» արտահայտությունը պետք է անփոփոխ թողնել: