پاکستان کې د زینب انصاري پلار د ده د لور په اړه پولیس تورن کړل
د نجلۍ پلار انیس انصاري چې د پېښې پر مهال له خپلې مېرمنې سره د عُمرې لپاره سعودي عربستان ته تللی و، د پنجاب ایالت له اعلي وزیر شهباز شریف سره له کتنې وروسته پولیس په بې غورۍ تورن کړل.
د پنجاب اعلي وزیر پرون څو ساعته وروسته له دې چې انصاري له سعودي عربستان څخه د خپلې لور د جنازې په مراسمو کې د ګډون لپاره راوګرځېد، کسور ښار ته لاړ.
ماشومه چې زینب انصاري نومېده، تېره اوونۍ یوه ګاونډي کور ته د قرانکریم د زدهکولو لپاره روانه وه چې بې درکه شوه.
د هغې مړی د سې شنبې په ورځ د کسور په یوه ډېران کې وموندل شو.
له دې پېښې وروسته پرون چهارشنبه په کسور کې د پارېدلو ښاریانو او پولیسو ترمنځ اخ او ډب وشو.
اعتراض کوونکو د پولیسو پر یوه ماموریت حمله وکړه؛ دوه تنه ووژل شول او ۳ نور ژوبل شول.