Qırım Yuqarı mahkemesi bağçasaraylı «Hizb ut-Tahrir işi» figurantlarınıñ apsini deñiştirmedi
Olar 2018 senesi martnıñ 9-na qadar SİZOda qalacaq, dep bildire Qırım.Aqiqat muhbiri.
Advokatlar Edem Semedlâyev Mammet Mambetov apishanede tutuvnı ev apsine çevirilmesi içün muracaat etken ediler.
«Mahkeme kene de imayeci tarafnıñ delillerini diñlemeyip, birinci instantsiya mahkemesiniñ qararını deñiştirmey qaldırdı. Bizler imaye etken şahıslar ev apsinde bulunğan taqdirde bile taqiqat ketişatından iç bir şekilde gizlenip ya da oña tesir etip olamaycağını ayttıq», – dep ikâye etti Mammet Mambetov.
Advokat Edem Semedlâyev apis müddeti uzatılacağına dair qarar materiallarını Kiev rayon mahkemesine keri qaytaracağınen bağlı ariza berdi. Onıñ sözlerine köre, apis müddeti uzatılacağına dair qarar qırımtatar tiline tercime etilmegen, albuki onıñ imayesi altındaki Timur İbragimov mahkemede terciman yardımını alğan, mahkeme ise onıñ arizasını red etken eken.
Oktâbrniñ 12-nde işğal altındaki Qırımda küç idaresiniñ hadimleri Bağçasaraynıñ altı sakini olğan Timur İbragimov, Marlen (Suleyman) Asanov, Memet Belâlov, Seyran Saliyev, Server Zekiryayev ve Ernest Ametovnı tevqif etken edi. FSB olarnı Rusiye ve ilhaq etilgen Qırımda yasaqlanğan «Hizb ut-Tahrir» azaları olğanında qabaatlay.
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı dep saya. Advokat Emil Kürbedinovnıñ qayd etkenine köre, Rusiye uquqqoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleridir.
«Hizb ut-Tahrir» halqara islâm siyasiy teşkilâtı bütün musulman devletleriniñ islâm halifatına birleştirilmesini öz maqsadı olğanını ayta, amma olar, bu maqsatqa irişmek oğrunda terroristik usullarnı red ete ve Rusiyede adaletsizce taqip etilgenini aytalar. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etken edi.