Պետական բուհի կարգավիճակը կպահպանեն այն ուսհաստատությունները, որոնց հիմնադիրը կլինի Կառավարությունը

Պետական բուհի կարգավիճակը կպահպանեն Ոստիկանության ակադեմիան, Կառավարման ակադեմիան, Պաշտպանության նախարարության, Արտակարգ իրավիճակների նախարարության ենթակայությամբ գործող հիմնարկները, «Ազատության» «Ըստ էության» թոք շոուի ժամանակ ասաց Կրթության և գիտության նախարարության բարձրագույն և հետբուհական մասնագիտական կրթության վարչության պետ Ռոբերտ Սուքիասյանը:


«Այսօր մենք ունենք 16 պետական բուհեր: Դրանց գերակշռող մասը արդեն իսկ փոխել է իր կազմակերպաիրավական ձևը, նրանք դարձել են պետական ոչ առևտրային կազմակերպություններ (ՊՈԱԿ) և աստիճանաբար որդեգրած քաղաքականության շրջանակում դարձել են հիմնադրամներ: Պետական բուհի կարգավիճակը կպահպանեն այն ուսումնական հաստատությունները, որոնց հիմնադիրը կլինի Հայաստանի կառավարությունը», - ասաց Սուքիասյանը՝ պատասխանելով հարցին, թե ըստ բարձրագույն կրթության համակարգում փոփոխություն նախատեսող օրինագծի ո՞ր բուհերը կպահպանեն պետական կարգավիճակը և որոնք կդառնան հասարակական բուհեր:


Ըստ «Բարձրագույն կրթության մասին» օրինագծի բուհերը դուրս կբերվեն պետական լծակներից, կրթության որակը կբարձրանա, քաղաքական պաշտոնյաները կամ մարզպետներն այլևս չեն կարող լինել բուհի կառավարման խորհրդում, փոխարենը կարող են այդ խմբում ընդգրկվել գործատուները:


«Ավելի արժևորվում է հավատարմագրման իմաստը, քանի որ բուհերը ավելի ավտոնոմ կլինեն և կարող է շարունակեն աշխատանքը առանց հավատարմագրման, բայց իրենց որակավորումները չեն ճանաչվի պետության կողմից: Դա շատ կարևոր է, քանի որ մենք կհրաժարվեք պետական նմուշի դիպլոմի գաղափարից և կունենանք հավատարմագրված ու ճանաչված որակավորումներ և չհավատարմագրված ու չճանաչված որակավորումներ: Ավելի թափանցիկ կլինի դաշտը, և էդ դեպքում ամբողջ երկիրը անորակ կրթության համար պատասխանատվություն չի կրի», - ասաց «Մասնագիտական կրթության որակի ապահովմանազգային կենտրոնի» տնօրեն Ռուբեն Թոփչյանը:


Օրինագծի քննադատները մտավախություն ունեն, որ այն չի նախատեսում համապատասխան մեխանիզմները՝ նշված նպատակներին հասնելու համար:


«Իրականում բացակայում են այն մեխանիզմները, որոնք միտված են այդ բարեփոխումները բերելու: Բոլորս տեսնում ենք, որ կա բարի կամք, որ փոփոխությունները բերենք, բայց թե ինչպես է դա արվելու․․․ Մեխանիզմների բացակայություն ես հստակ տեսնում եմ: Օրինակ, չկա մեխանիզմ դրված, թե ինչպես կարող ենք ապահովելակադեմիական ազատությունը», - ասաց կրթության ոլորտի փորձագետ Արևիկ Անապիոսյանը:


«Ելք» դաշինքի անդամ, Երևանի պետական համալսարանի դասախոս Արայիկ Հարությունյանն ընդգծեց, այս օրենքով չի վերանում բուհերի քաղաքականացվածության խնդիրը և Ազգային Ժողովում առաջիկայում քննարկումների ժամանակ պետք է հստակեցվի այդ դրույթը: