Կլոր սեղանի փուլը կարելի է ասել ավարտված է. զիջումների գնալու ցանկություն ի սկզբանե չի եղել. Հայկ Զաքարյանը՝ տարկետման սահմանափակման մասին
Քննարկման, կլոր սեղանի փուլը կարելի է ասել ավարտված է, այն զիջումները, որ ի սկզբանե նրանք խոստացել էին, քննարկումների ժամանակ պարզ դարձավ, որ զիջումների գնալու ցանկություն ի սկզբանե չի եղել: Այս մասին «Ազատություն» ռադիոկայանի եթերում ասել է «Հանուն գիտության զարգացման» նախաձեռնության անդամներ Հայկ Զաքարյանը՝ անդրադառնալով տարկետման սահմանափակման դեմ իրենց պայքարին ու կոմպրոմիսի գնալու իշխանությունների խոստումներին:
Նշենք, որ նախաձեռնություն անդամներ Դավիթ Պետրոսյանը և Յուրի Ավագյանը վերսկսել էին հացադուլը, սակայն Յուրի Ավագյանի մոտ բժիշկներն ախտորոշել են թոքաբորբ, և նա ստիպված է եղել դադարեցնել հացադուլը: Նախաձեռնության անդամների տեղեկացմամբ Դավիթ Պետրոսյանն էլ սրտի զարկերի հաճախականության հետ կապված խնդիր ունի, եթե նորմայում մեծահասակի սրտի զարկերի հաճախականությունը պետք է մեկ րոպեում լինի 60-80 անգամ, նրա մոտ 120-130 զարկ է: Սակայն Դավիթ Պետրոսյանը շարունակում է հացադուլը:
«Պահանջներն ուղղված են առաջին հերթին Կրթության և գիտության նախարարությանը և Պաշտպանության նախարարությանը: Նրանց պատկերացմամբ՝ տարկետման իրավունք կտրվի կրթության, գիտության, սպորտի ոլորտում բացառիկ հաջողությունների հասած տղաներին, բացառիկ ոչ միայն Հայաստանի մասշտաբով, այլ նաև ամբողջ աշխարհի մասշտաբով: Այդպիսի մոտեցումը, այսինքն՝ թողնել գիտությունը հանճարների վրա, պետականակերտ մտածելակերպ չէ»,-ասել է Հայկ Զաքարյանը:
Նրա խոսքով՝ դա այն խնդիրները չի վերացնի, որի համար տարկետումը սահմանափակում են, այս օրենքով գիտությանը հասցրած հարվածն այդ մոտեցմամբ չեն կոմպենսացնի:
«Անձամբ մեր կողմից հացադուլի ճանապարհը ողջունելի չէ, քանի որ իրենց կյանքը, իրենց առողջությունը մեզ համար առաջնահերթ է: Հիմա իրենց դրած պահանջը հետևյալն է. քանի որ նախարարություններն էլ ի սկզբանե ընդունել են, որ կա կոռուպցիա, կան կոռուպցիոն սողանցքներ կրթության մեջ, դրա հետևանքով էլ շատերը թեկնածու դառնալով ազատվում են բանակից, առաջին պահանջն այն է, որ Կրթության նախարարությունը քայլ կատարի, տվյալներով ցույց տա, թե այդ կոռուպցիան որտեղ է: Թեկնածուականները գուցե լավը չեն, բայց հստակ թիվ ցույց տվեք, կոռուպցիայի տեղը ցույց տվեք, ովքեր են կոռումպացված, ինչքա՞ն մարդ է դրա հետևանքով թեկնածուական պաշտպանում»,-առաջարկել է «Հանուն գիտության զարգացման» նախաձեռնության անդամը:
Նրա ձևակերպմամբ՝ տղաները սպասում են ինչ-որ գործողության, որն իրականանում շատ հեշտ է կատարելը: «Եթե իրենք դա չեն անում, նշանակում է կա՛մ այդ հացադուլավորների կյանքն ու առողջությունը ոչինչ է այդ մարդկանց համար, կա՛մ իրենք կոռուպցիայի մեջ թաթախված են»: