Արամ Աթեշյանը չարտասանեց «Հայոց ցեղասպանություն» բառակապակցությունը (տեսանյութ)
Գերմանիայի Բունդեսթագի կողմից Հայոց ցեղասպանությունը ճանաչող բանաձևի ընդունումից հետո Էրդողանին նամակ է գրել եմ պոլսահայերի շահերից ելնելով. այս մասին լրագրողների հետ հանդիպմանն այսպես ասաց Պոլսո պատրիարքարան աթոռի միաբան, Թուրքիայի կողմից Պոլսո պատրիարքի փոխանորդ ճանաչվող Արամ արքեպիսկոպոս Աթեշյանը:
«Ես նայել եմ բոլոր իմ նախկինների գրածները, բոլորն էլ այդ ձևով գրել են, ես դա արել եմ պոլսահայերի շահի համար: Ես ինքնագլուխ ոչինչ չեմ արել: Նամակն էլ մի քանի հոգով ենք գրել»,- ասաց Աթեշյանը՝ նշելով, որ շատ կալվածքներ կան, որ պետք է հետ առնվեն և գոռալով համայնքը դրանք չի կարող վերցնել:
Նա միայն նշեց, որ ինքը նամակում չի գրել, որ ցեղասպանություն չի եղել, բայց չի էլ գրել, որ այն եղել է:
«Հրանտ Դինքն էլ է գրել և իմ նախնիները, որ երրորդ երկրները մեզ որպես «ջոկերի» թուղթ պետք չէ, որ օգտագործեն: Գերմանիան ինչո՞ւ Հայոց ցեղասպանությունը չընդունեց 100-ամյակին, երկու տարի հետո դա արեց, որովհետև Թուրքիայի հետ իր հարաբերությունները վատացան և դա սեղան բերեց: Բոլոր երկրներն էլ այդպես են անում, մեր ասածն այն է, որ Թուրքիան և Հայաստանը պետք է համաձայնեն, թե խնդիրները ինչպես պետք է լուծվեն»,-ասաց նա:
Արամ Աթեշյանն այդպես էլ չարտասանեց «Հայոց ցեղասպանություն» բառը, նաև չպատասխանեց, թե ինքն անձամբ ընդունո՞ւմ է, որ Հայոց ցեղասպանությունը եղել է հարցին, նշեց, թե նա դրա հետ գործ չունի:
Tert.am-ի դիտարկմանը, թե ինչ կլիներ, եթե նա Էրդողանին նամակ չգրեր, պատասխանեց. «Ոչինչ էլ չէր լինի»,- նշեց նա: