Կարո Փայլանի՝ խորհրդարանում խոսելու հետևանքով մենք կորցնում ենք մեր իրավունքները. Արամ Աթեշյան
Կարո Փայլանը Հայաստանում երկու կողմից է խոսել, թե՛ զարկել է, թե՛ շոյել է. Երևանում լրագրողների հետ հանդիպմանն այս կարծիքը հայտնեց Պոլսո պատրիարքական աթոռի միաբան Արամ արքեպիսկոպոս Աթեշյանը՝ Ժողովրդադեմոկրատական կուսակցության հայազգի պատգամավոր Կարո Փայլանի՝ Հայաստանում արված հայտարարության մասին, թե Հայաստանն ու Թուրքիան իրենց հարաբերությունների նոր էջից պետք է կարգավորվեն:
Աթեշյանը նշեց, որ այդպես էլ պետք է վարվեն Թուրքիայում ապրողները: Դիտարկմանը, թե արդյոք ինքը երբեմն խորհուրդ տալի՞ս է Կարո Փայլանին, նա պատասխանեց.
«Հայ համայնքն անհանգիստ է պառլամենտի մեջ իր խոսելու, գոռալու, կանչելու համար, որովհետև մենք կկորցնենք մեր իրավունքները: Դուք Հայաստանում ինչ ուզում եք, խոսում եք, դուք մեզ չեք հասկանում»,- ասաց նա:
Ըստ Արամ Աթեշյանի՝ Կարո Փայլանը խորհրդարանում այնպես պետք է խոսի, որպեսզի համայնքին վնաս չտա: «Եթե համայնքը անհանգիստ է, ուրեմն մի բան կա մեջտեղում»,-ասաց նա:
Անդրադառնալով Կարո Փայլանի՝ Թուրքիայի ներքին գործերի նախարարությանն ուղղված դիմումին՝ Պոլսո պատրիարքական ընտրությունների անցկացման վերաբերյալ, Արամ Աթեշյանը նշեց, որ դեռ պետք է սպասել պատասխանին: