Ճապոնացի փորձագետները նախապես հաստատված 250 հազար դոլարի փոխարեն առաջարկել են 650 հազար դոլարի դրամաշնորհ սահմանել. Ա. Ամիրյան
Այսօր Կառավարության նիստին հաստատվեց «Հայաստանի Հանրապետության և Ճապոնիայի կառավարությունների միջև «Պատմամշակութային ժառանգության գիտահետազոտական կենտրոնի՝ հնագիտական գտածոների վերականգնման և պահպանման համար սարքավորումների բարելավման ծրագիր» հայտագրերի փոխանակման ձևով կնքվող դրամաշնորհի ծրագիրը։ Նախագիծը ներկայացրեց ՀՀ մշակույթի նախարար Արմեն Ամիրյանը:
«Գիտահետազոտական կենտրոնի կարևոր գործառույթներից է վտանգված և վերականգնվող հուշարձանների պեղումները, որոնց արդյունքում հայտնաբերվել են հրատապ վերականգնման կարիք ունեցող հարյուր հազարավոր հնագիտական արժեքներ։ Մշակույթի նախարարությունը նախաձեռնել է ճապոնական դրամաշնորհի միջոցով նորագույն սարքավորումներով համալրել կենտրոնի հնագիտական լաբորատորիան»,-ասաց նա:
Նախարարը նշեց, որ ճապոնացի փորձագետները եղել են Հայաստանում և ուսումնասիրել խնդիրը․ «Նախապես հաստատված 250 հազար դոլարի փոխարեն առաջարկել են 650 հազար դոլարի դրամաշնորհ սահմանել»,-ասաց նա և նշեց, որ Ճապոնական կողմը պետք է այդ գումարով գնի ճապոնական և եվրոպական արտադրության նորագույն սարքավորումներ և անհատույց տրամադրի կենտրոնին։
«Վերազինումից հետո կենտրոնի լաբորատորիան կդառնա տարածաշրջանում լավագույնը, որի ծառայություններից կարող են օգտվել և հարևան երկրների արշավախմբերը և թանգարանները»,-ասաց Արմեն Ամիրյանը։
Նախագծի վերաբերյալ վարչապետ Կարեն Կարապետյանը հանձնարարեց հետագայում ներկայացնել կատարված աշխատանքները: «Ներկայացրեք հայտնաբերված հնագիտական արժեքները, որ տեսնենք ինչքանով ենք կարողանում մեր քաղաքացուն, զբոսաշրջիկին ծանոթացնել, թե չէ մեկ-մեկ ինձ մոտ տպավորություն է, որ ինքնանպատակ է»,-ասաց վարչապետը, իսկ Արմեն Ամիրյանն արձագանքեց, որ հայտնաբերված գտածոները վերջնական տեսքի բերելու և աշխարհին ներկայացնելու համար անհրաժեշտ է այդ լաբորատորիան, ինչն էլ կլինի խթանող քայլ։