«Զվարթնոցից» մեկնող և ժամանող 21 ավիաթռիչք ուշանում է խիտ մառախուղի պատճառով
«Զվարթնոց» միջազգային օդանավակայանից մեկնումներն ու ժամանումներն ուշանում են:
Tert.am-ի հետ զրույցում Քաղաքացիական ավիացիայի գլխավոր վարչության մամուլի քարտուղար Սաթենիկ Հովհաննիսյանն ասաց, որ ուշացումների պատճառը եղանակային պայմաններն են.« Եղանակային պայմանների՝ խիտ մառախուղի պատճառով «Զվարթնոց» միջազգային օդանավակայանից որոշ ուղղություններով մեկնումներն ու ժամանումները ուշանում են»:
Ըստ օդանավակայանի պաշտոնական կայքի՝ ժամը 11:40-ի դրությամբ ուշանում են Երևանից մեկնող և Երևան ժամանող 21 ավիաթռիչք:
Նույն ժամի դրությամբ ուշացումով կիրականացվեն Երևանից դեպի Մոսկվա, Սարատով, Դուբայ, Դոհա, Շարմ Էլ Շեյխ, Նովոսիբիրսկ թռիչքները:
Ուշացում է հայտարարվել նաև Դուբայից, Մոսկվայից, Դոհայից, Շարմ Էլ Շեյխից, Փարիզից, Հռոմից. Սարատովից, Նովոսիբիրսկից դեպի Երևան ժամանող ավիաթռիչքների համար: