Հայաստան-ՆԱՏՕ հարաբերություններում որևէ մարտահրավեր չեմ տեսնում. ՆԱՏՕ-ի կապի գրասենյակի փոխղեկավար
Հայաստանի-ՆԱՏՕ հարաբերություններում որևէ մարտահրավեր չեմ տեսնում. այսօր լրագրողների հետ զրույցում այսպես ասաց ՆԱՏՕ-ի կապի գրասենյակի ղեկավարի տեղակալ Ռոզարիա Պուգլիսին՝ հիշատակելով դեռևս հունիսին Երևան ժամանած Կովկասում և Կենտրոնական Ասիայում ՆԱՏՕ-ի գլխավոր քարտուղարի հատուկ ներկայացուցիչ Ջեյմս Ապատուրայի խոսքերը, թե ՆԱՏՕ-Հայաստան հարաբերությունները կայուն և վստահելի են:
«Դա նշանակում է, որ մենք գիտենք, թե Հայաստանն ինչ է ցանկանում, և մենք գոհ ենք դրանից»,- ասաց նա:
Խոսելով արդեն համագործակցության ընդլայնման հնարավորությունների մասին՝ նա նշեց, որ հարցի հասցեատերն առաջին հերթին Հայաստանն է:
«Մի օրինակ բերեմ, թե ինչպես է կազմվում անհատական գործընկերության ծրագիրը: Այդ հիմնական փաստաթղթով է սահմանվում հիմնական գործողությունների ծրագիրը: Այն կազմվում է փոխադարձ համաձայնությամբ»,- ասաց նա՝ նկատելով, որ ամեն ինչ համաձայնեցվում է կողմերի միջև:
Այս համատեքստում նա Հայաստան-ՆԱՏՕ համագործակցությունն առանձնահատուկ համարեց: «Նմանատիպ համագործակցություն մենք չունենք մեկ այլ երկրի հետ: Դա նշանակում է, որ մեր համագործակցությունը հարմարեցված է` ըստ իշխանությունների արտահայտած կարիքների: Մենք դրանով ենք կազմում մեր համագործակցության բուն կորիզը, մենք միասին ենք աշխատում եղած հարցերը պարզաբանելու համար»,- ասաց նա:
Խոսելով ՆԱՏՕ-ի` Հարավային Կովկասում ներգրավվածության մասին, Ռոզարիա Պուգլիսին հիշատակեց, որ իրենց գրասենյակը գործունեություն է իրականացնում Հարավային Կովկասի երեք երկրում՝ Վրաստանում, Ադրբեջանում և Հայաստանում: Առաջինը, ըստ նրա, որոշել է իր համագործակցությունն ընդլայնել ՆԱՏՕ-ի հետ, ինչին վերջինս աջակցում է, իսկ Հայաստանն ու Ադրբեջանը դեռևս չունեն նման ցանկություն:
«Ինչը նորմալ է»,- ասաց նա:
Նշենք, որ Դեկտեմբերի 13-ից 18-ը ՀՀ արտաքին գործերի նախարարությունը՝ ՀՀ պաշտպանության նախարարության հետ համագործակցությամբ, Կովկասում ՆԱՏՕ-ի գրասենյակի, ՀՀ-ում ԳԴՀ, ԱՄՆ և ՄԹ դեսպանությունների, Երևանում ՆԱՏՕ-ի տեղեկատվական կենտրոնի աջակցությամբ, Անհատական գործընկերության գործողությունների ծրագրի շրջանակներում Հայաստանում անցկացնելու է հերթական (թվով 11-րդ) «ՆԱՏՕ-ի շաբաթ» միջոցառումը:
ՆԱՏՕ-ի շաբաթ միջոցառումների մեկնարկը տրվել է Հայաստանում ՆԱՏՕ-ի տեղեկատվական կենտրոնում ԶԼՄ ներկայացուցիչների համար՝ Հայաստան-ՆԱՏՕ գործընկերության վերաբերյալ քննարկման կազմակերպմամբ: