Ստամբուլում մեկնարկել է «Իսլամական համագործակցության կազմակերպության» արտահերթ գագաթաժողովը
Հավաքի նպատակը, ինչպես նշում են թուրքական լրատվամիջոցները, Մերձավոր Արևելքում ստեղծված իրավիճակի քննարկումն է՝ ԱՄՆ-ի նախագահ Դոնալդ Թրամփի Երուսաղեմը Իսրայելի մայրաքաղաք ճանաչելու որոշման լույսի ներքո։
«Իսլամական երկրների առաջնորդները քննարկում են այդ հարցով անհրաժեշտ քայլերը, որոնք պետք է ձեռնարկվեն», - նշում է «Անադոլու» գործակալությունը։
Հիշեցնենք՝ անցյալ շաբաթ Թրամփը հայտարարել է, թե պաշտոնապես ճանաչում է Երուսաղեմը որպես Իսրայելի մայրաքաղաք և հանձնարարել է Պետդեպարտամենտին սկսել ԱՄՆ դեսպանատունը Թել Ավիվից Երուսաղեմ տեղափոխելու նախապատրաստական աշխատանքները:
Թրամփի այս հայտարարությունն աննախադեպ լարվածություն է առաջացրել Մերձավոր Արևելքում և արժանացել տարածաշրջանի երկրների կոշտ քննադատությանը։