ԱՄՆ-ն պահանջում է 250 մլն դոլարով կրճատել ՄԱԿ-ի բյուջեն
Միացյալ Նահանգները պահանջում է ՄԱԿ-ից 2018-2019թթ. բյուջեն կրճատել 250 մլն դոլարով, հայտնում է rbc.ua-ն՝ մանրամասնելով, որ կրճատումները կարող են վերաբերել Պաղեստինում, Լիբիայում և Աֆղանստանում ՄԱԿ-ի առաքելություններին:
Աղբյուրը նկատում է, որ ամերիկյան կողմի առաջարկած կրճատումները կարող են հանգեցնել կազմակերպության զարգացման ծրագրերի ու նոր աշխատակիցների վարձման դադարեցմանը, ինչպես նաև ՄԱԿ-ի աշխատակազմի աշխատավարձերի կրճատմանը:
Սակայն ՄԱԿ-ի ներկայացուցիչները նշել են, որ պատրաստ են ֆինանսավորումն առնվազն 170 մլն դոլարով կրճատել:
Հայտնի է, որ ՄԱԿ-ի 2018-2019թթ. բյուջեն պետք է հաստատվի մինչև տարեվերջ: Կազմակերպությունն իր ծախսերի համար 5.45 մլրդ դոլար է պահանջում, ինչը 200 մլն դոլարով քիչ է 2016-2017թթ. բյուջեի գումարից:
Նշվում է, որ ՄԱԿ-ի բյուջեն ձևավորվում է անդամ պետությունների վճարների արդյունքում: Յուրաքանչյուր երկիր վճարում է գումարը՝ ելնելով ՀՆԱ-ի, արտաքին պարտքի ու բնակչության մեկ շնչին բաժին ընկնող եկամտի չափի ցուցանիշներից:
Ներկայում ՄԱԿ-ի շրջանակում ամենախոշոր գումար վճարող երկիրն ԱՄՆ-ն է: