Ֆաշիզմը ձգտում էր վերացնել բոլորին, ովքեր կանգնած էին իրենց դեմ, իսկ ՀՀԿ-ն նման ձգտում չունի. Մերուժան Հովհաննիսյան

Ոչ մի առարկություն չունեմ ռուսական «Զվեզդա» հեռուստաալիքի հաղորդավարուհու հնչեցրած մտքի հետ, որ Հայաստանի Հանրապետական կուսակցության խորհրդանշանը նման է ֆաշիստական Գերմանիայի գերբին: Tert.am-ի հետ զրույցում ասաց բանաստեղծ Մերուժան Հովհաննիսյանը:

«Երկու սիմվոլներն էլ ընդգրկում են արեգակնային հավերժություններ: Ընդհանուր համեմատության կարգով ասեմ, որ նման է, բայց այնպես չէ, որ մեկը մեկի արտագրությունն է, այնպես չէ, որ ՀՀԿ-ն արտատպել է խորհրդանիշը: Իսկ գաղափարական նմանություններ չեմ տեսնում, որովհետև ՀՀԿ-ականները սոցիալիստներ չեն, ազգայնականներ են, իսկ դրանք իրարամերժ գաղափարներ են»,- ասաց Հովհաննիսյանը:

Բանաստեղծը նշեց, որ ՀՅԴ-ում օրինակ կա ազգայնական սոցիալիզմ, բայց ազգայնականները այդպիսին չեն, նրանք կապիտալիստների զավակներ են, ուստի գաղափարական նմանություններ չունեն:

Հիշեցնենք, որ «Զվեզդա»-ն պատկանում է Ռուսաստանի պաշտպանության նախարարությանը, իսկ հաղորդավարուհին՝ Վերոնիկա Կրաշեննիկովան, Ռուսաստանի իշխող՝ «Եդինայա Ռոսիա» կուսակցության բարձրագույն խորհրդի անդամ է, որի նախագահը ՌԴ նախագահ Վլադիմիր Պուտինն է:

Հաղորդավարուհին, մասնավորապես խոսել էր այն մասին, որ Հայաստանը, որը Ռուսաստանի գլխավոր դաշնակիցն է Հարավային Կովկասում, ԵԱՏՄ և ՀԱՊԿ անդամ է, պատրաստվում է մի քանի օրից Բրյուսելում Եվրամիության հետ ստորագրել համագործակցության համաձայնագիր: Նա նշել էր, որ Ուկրաինայի նման Հայաստանը քաղաքական երկխոսություն է սկսում Եվրամիության հետ:

«Ասոցիացիան միակ բանը չէ, որը Հայաստանն անում է Ուկրաինայի նման: Դժվար է հավատալ, բայց Երևանը հերոսացնում է նաև ֆաշիզմի աջակիցներին»,- ասել էր հաղորդավարուհին: Այս համատեքստում նա նշել էր, որ Հայաստանում իշխող կուսակցության խորհրդանիշը նման է հիտլերյան Գերմանիայի զինանշանին, իսկ ՀՀԿ գաղափարախոսությունը Նժդեհյան գաղափարախոսությունն է: 

Բանաստեղծ Մերուժան Հովհաննիսյանը նշեց, որ հաղորդման ժամանակ հնչեցրած մտքերը մոտ են ճշմարտությանը, բայց ճշմարտացի չեն: «Այն իր մեջ չունի ֆաշիզմի որևէ էլեմենտ: Ֆաշիզմը ձգտում էր վերացնել բոլորին, ովքեր կանգնած էին իրենց դեմ՝ հրեաներին, մյուսներին, իսկ ՀՀԿ-ն նման ձգտում չունի»,- ասաց Մերուժան Հովհաննիսյանը:

Բանաստեղծը նաև նշեց, թե քանի որ ՀՀԿ-ականները նժդեհականներ են իրենց համարում, Աշոտ Նավասարդյանը, ով նժդեհապաշտ էր, կիսահեթանոս դավանաբանության հետևորդ էր, որը ներառում է արեգակի հավերժությունը, այլ՝ սիմվոլներ, ՀՀԿ լոգոյի ստեղծման վրա իր մոտեցումներով ազդեցություն է ունեցել: