Այն, որ ՀՎԿ-ն չկա ԱԺ–ում, կարծում եմ՝ նաև Վանաձորում տեղի ունեցածի արդյունք է. Էդմոն Մարուքյան
Այսօր Վանաձորի ավագանու արտահերթ նիստում տեղի ունեցածը մեկնաբանելու որևէ բան չկա: Tert.am–ին հայտնեց «Լուսավոր Հայաստան» կուսակցության նախագահ Էդմոն Մարուքյանը՝ ավելացնելով՝ ամեն ինչ պարզ է, և ընդդիմադիր 5000 ձայներ այսօր միացվել են ՀՀԿ-ին:
Ըստ նրա՝ այս մարդիկ, ովքեր ձայն են տվել «Հայկական վերածնունդ» կուսակցությանը, եթե ուզենային ընտրել Մամիկոն Ասլանյանին, Մամիկոն Ասլանյանին ընտրած կլինեին:
«Այսինքն՝ ՀՀԿ-ին ընտրած կլինեին և կրկնում եմ՝ այդ 5000 ձայնը, որ ստացել է ՀՎԿ-ն, ընդդիմադիր ձայներ են և նրանք դրանք միացրել են ՀՀԿ-ին: Սա մի բան է, որ գնահատականը կտան վանաձորցիները՝ հետագա ընտրություններում: Եվ այն, որ այսօր ՀՎԿ-ն խորհրդարանում չէ, կարծում եմ՝ նաև Վանաձորում տեղի ունեցածի արդյունք է»,– ասաց նա:
Հիշեցնենք, որ այսօր Սահմանադրական դատարանի արտահերթ նիստից հետո Վանաձորի ավագանու անդրանիկ նիստում 20 ձայնով Վանաձորի քաղաքապետի առաջին տեղակալ ընտրված Արկադի Փելեշյանն ասել էր, որ Վանաձորի քաղաքապետի ընտրություններին ինքն ընտրել է Քրիստ Մարուքյանին, սակայն փոշմանել է դրա համար:
Ի պատասխան նախկին դաշնակցի այս հայտարարության, Էդմոն Մարուքյանն ասաց. «Եթե ՀՎԿ–ն ընտրած լիներ (Քրիստ Մարուքյանին – Tert.am), Վանաձորը կունենար նորմալ գործող քաղաքապետ և ավագանի, և այդ քաղաքական ճգնաժամը չէր լինի։ Սկզբից նրանք խախտել են իրենց ձեռքով ստորագրած հուշագիրը և գաղտնի ընտրել Մամիկոն Ասլանյանին և հիմա էլ բացահայտ են միացվել ՀՀԿ–ին, որով 5 000 ընդդիմադիր ձայնը տվել են ՀՀԿ-ին։
Ինչ վերաբերում է կառավարություն ուղարկված դիմումին, ապա Էդմոն Մարուքյանը նշեց, որ պարզ է, որ մեկ օրվա մեջ կառավարությունը չէր կարող քննարկել այդ հարցը։ «Թե ինչ տպավորություն կա, չգիտեմ, իսկ կառավարությունն ունի իր ժամկետները, կքննարկենք իրենց պատասխանը, մեր դիմումը, մանրամասն հիմնավորված,իրավական վերլուծությունով, բոլորդ տեսել եք»,- ավելացրեց ԼՀԿ նախագահը:
Ամփոփելով՝ Էդմոն Մարուքյանն ասաց. «Մեր կռիվը ՀՀԿ-ի հետ է և մեզ չեն կարող այլ ուժերի դաշտ նետելով ներքաշել անիմաստ բանավեճի մեջ։ Մենք սպասում ենք կառավարության կողմից ՍԴ որոշման կիրարկմանը»։