Լավ կլիներ, որ Ադրբեջանի խոսքերը համընկնեին գործողություններին. Էդվարդ Նալբանդյան
Ադրբեջանի հրապարակային հայտարարությունները տարբերվում են նրանց գործողություններից: Լրագրողների հետ զրույցում ասաց Հայաստանի արտաքին գործերի նախարար Էդվարդ Նալբանդյանը՝ պատասխանելով այն հարցին, թե ինչո՞ւ է Լեռնային Ղարաբաղի հակամարտության կարգավորման գործընթացը ձգձգվում, երբ Ադրբեջանի նախագահ Իլհամ Ալիևը երեկ հայտարարել է, որ կողմնակից է կոնֆլիկտի շուտափույթ կարգավորմանը:
«Խնդիրն այն է, որ խոսքերը պետք է համընկնեն, չշեղվեն գործողություններից: Լավ կլիներ, եթե խոսքերը համապատասխանեին գործերին, մանավանդ, երբ Ժնևում խոսվում էր այն մասին, որ պետք էր միջոցներ ձեռնարկել լարվածությունը նվազեցնելու համար:
Հիշեցնեմ կարգավորմանն ուղղված մի քանի նմանօրինակ դեպք: Կազանի նախօրեին մենք ԱԳ նախարարների մակարդակով հանդիպումներ անցկացրինք, որպեսզի համաձայնեցնենք հիմնական սկզբունքների տեքստը, որը հետագայում պետք է ներկայացվեր նախագահներին: Գագաթաժողովից 10 օր առաջ մենք ստացանք ուղեկցող նամակ, ներառյալ տեքստերը: Պայմանավորվել էինք, որ տեքստերի մեջ փոփոխություններ չեն լինելու, բայց նրանք Կազան եկան 12 փոփոխություններով՝ նահանջելով մեկ քայլ հետ:
2011թ. Մարտին նման բան եղավ, դրանից առաջ Աստրախանում, Սանկտ Պետերբուրգում: Դա եղել էր նաև Կազանից հետո: Չանդրադառնամ բոլոր հանդիպումներին, պարզապես հիշեցնեմ, որ Վիեննայում ու Սանկտ Պետերբուրգու մենք որոշակի համաձայնություններ ձեռք բերեցինք, բայց հետո նրանք հայտարարեցին, որ որևէ բանի շուրջ էլ չեն համաձայնել: Նրանք հայտարարեցին, որ թյուրըմբռնում է եղել»,- ասաց Էդվարդ Նալբանդյանը:
ՀՀ արտգործնախարարը նշեց, որ ադրբեջանցի գործընկերների հետ 4 անգամ կապ է հաստատվել, իրենք ասել են, որ այո մենք համաձայն ենք, որ ֆինանսավորվի ԵԱՀԿ գործող նախագահի անձնական ներկայացուցիչ, դեսպան Անջեյ Կասպրչիկի թիմի ընդարձակումը, բայց 4 ագամ ԵԱՀԿ բյուջետային հանձնաժողովում արգելափակել են այդ հարցը:
Նա հիշեցրեց, որ Ադրբեջանը համաձայնել էր նաև մի քանի անգամ դադարեցնել նաև կրակը շփման գծում, բայց ամեն ճիշտ ու սուտ գործածելով փորձում են հետ նահանջել այդ համաձայնություններից:
ՀՀ ԱԳ նախարարն ասաց, որ Հայաստանը պատրաստ է շարունակել բանակցությունները հասնելու համար հակամարտության բացառապես խաղաղ կարգավորմանը: