Մենք ուշադիր հետևում ենք Լեռնային Ղարաբաղի հակամարտությանը. ԵԱՀԿ գլխավոր քարտուղար
ԵԱՀԿ-ն ուշադիր հետևում է Լեռնային Ղարաբաղի հակամարտությանը, հայտարարել է ԵԱՀԿ գլխավոր քարտուղար Թոմաս Գրեմինգերը РБК-ին տված հարցազրույցում:
«Իհարկե, մենք շատ ուշադիր հետևում ենք զարգացումներին»,- ասել է Գրեմինգերը՝ հավելելով, որ ԵԱՀԿ-ն ունի հատուկ գործիք՝ ԵԱՀԿ նախագահի անձնական ներկայացուցիչ Անջեյ Կասպրչիկի գլխավորած առաքելությունը, որի աշխատակիցներն ուշադիր հետևում են շփման գծում տիրող իրավիճակին:
«Մեր անհանգստությունն էին առաջացրել ոչ վաղ անցյալում հակամարտության բռնկման դեպքերը: Իմ դերը որպես գլխավոր քարտուղար աջակցություն տրամադրելն է Մինսկի խմբի երեք համանախագահներին, որոնց ջանքերն ուղղված են Լեռնային Ղարաբաղի հակամարտության խաղաղ կարգավորմանը»,- ասել է ԵԱՀԿ գլխավոր քարտուղարը:
Հիշեցնենք, որ նախօրեին «Ինտերֆաքս» գործակալության հետ զրույցում ԵԱՀԿ գլխավոր քարտուղար Թոմաս Գրեմինգերը, խոսելով ԼՂ հակամարտության կարգավորման գործընթացի մասին, հայտարարել էր, որ Լեռնային Ղարաբաղի հակամարտությունը կարգավորելու միակ միջոցն այն է, որ կողմերն ազնիվ մտադրություններով վերադառնան բանակցությունների սեղանի շուրջ:
«Երկարատև ձգվող հակամարտությունը կարգավորելու միակ միջոցն այն է, որ կողմերն ազնիվ մտադրություններով վերադառնան բանակցությունների սեղանի շուրջ: ԵԱՀԿ-ն հարթակ է տրամադրում երկխոսության համար և աջակցում է կողմերին երկարաժամկետ խաղաղության ձեռքբերման հարցում: Իսկ դրա համար անհրաժեշտ է իրական քաղաքական կամք և կողմերի հանձնառությունը: Միայն հակամարտության կողմերը կարող են հասնել խաղաղ կարգավորման: ԵԱՀԿ-ն չի կարող հակամարտության լուծում պարտադրել»,- ասել է նա: