Թուրքիայի քրդամետ կուսակցությունը դատապարտել է ՆԱՏՕ-ին ու անընդունելի համարել Աթաթուրքին ու Էրդողանին ուղղված վիրավորանքը
Թուրքիայի քրդամետ Ժողովրդադեմոկրատական կուսակցության պատգամավոր, կուսակցության խորհրդարանական խմբակցության ղեկավար Ահմեդ Յըլդըրըմը, մեկնաբանելով Նորվեգիայում ՆԱՏՕ-ի զորավարժանքի ժամանակ սկանդալային պաստառի հետ կապված միջադեպը, հայտարարել է, որ Թուրքիայի հանրապետության հիմնադիր ու առաջին նախագահ Մուսթաֆա Քեմալ Աթաթուրքի, ինչպես նաև այժմյան նախագահ Ռեջեփ Թայիփ Էրդողանի հանդեպ Նորվեգիայում ցուցաբերված անարգանքն անընդունելի է և որևէ արդարացում չունի:
Ինչպես գրում է թուրքական demokrathaber.org կայքը, քուրդ քաղաքական գործիչը շեշտել է, որ ՆԱՏՕ-ի այս քայլը հարձակում է մարդկային արժանապատվության դեմ:
Քրդամետ կուսակցությունը, դատապարտելով Նորվեգիայում տեղի ունեցածը, կոչ է արել մանրակրկիտ հետաքննել հարցը: Յըլդըրըմը շեշտել է, որ ավելի քան կարևոր է պարզել, թե արդյոք դա Թուրքիայի դեմ անհատական անձանց վերաբերմունքի արդյունք է, թե ոչ:
Հիշեցնենք, որ օրեր առաջ Նորվեգիայում ՆԱՏՕ-ի զորավարժանքի ժամանակ ցուցադրվել էր «Թշնամիների պաստառ», որի վրա ցուցադրվել էին Թուրքիայի հանրապետության հիմնադիր ու առաջին նախագահ Մուսթաֆա Քեմալ Աթաթուրքի, ինչպես նաև այժմյան նախագահ Ռեջեփ Թայիփ Էրդողանի նկարները: