Գարեգին Բեկչյանը նամակ է հղել Էրդողանին ու Թուրքիայի ՆԳՆ-ին
Պոլսո Հայոց պատրիարքի տեղապահ Գարեգին արքեպիսկոպոս Բեկչյանը պատրիարքական ընտրությունների անցկացման առնչությամբ նամակ է հղել Թուրքիայի նախագահ Ռեջեփ Թայիփ Էրդողանին ու ներքին գործերի նախարար Սուլեյման Սոյլուին, այս մասին տեղեկանում ենք պատրիարքարանի պաշտոնական կայքից:
Նամակի բովանդակության ու այլ մանրամասների մասին տեղեկություններ չեն հաղորդվում: Ստամբուլի հայկական պարբերականներից «Ակօսը» նշում է, որ նամակն, ամենայն հավանականությամբ, վերաբերում է պատրիարքական ընտրությունների կազմակերպման համար իշխանություններից համապատասխան համաձայնություն չստանալու պատճառով վերջին ամիսներին պոլսահայ համայնքում ստեղծված ճգնաժամին:
Հիշեցնենք, որ դեռևս օգոստոսին նախաձեռնող խումբը Պոլսո Հայոց պատրիարքի տեղապահ Գարեգին Բեկչյանի գլխավորությամբ Ստամբուլի նահանգապետարանին է հանձնել պատրիարքի ընտրությունների անցկացման մասին դիմումը՝ առաջարկելով դրանք անցկացնել դեկտեմբերի 13-ին: Նահանգապետարանը պետք է պատասխան հղեր համայնքին մինչև հոկտեմբերի 9-ը, սակայն սպասված պատասխանը մինչ օրս չկա:
Մինչ այդ մամուլում հայտնվեցին հայկական Սուրբ Փրկիչ հիվանդանոցի ղեկավար Պետրոս Շիրինօղլուի կողմից շրջանառության մեջ դրված լուրերն այն մասին, թե պետությունը չի ցանկանում Բեկչյանին տեսնել ապագա պատրիարքի պաշտոնում:
Նշենք, որ Պոլսո պատրիարք Մեսրոպ Մութաֆյանը կոմայի մեջ է գտնվում 2008թ.-ից և փաստացի չի կարող կատարել պատրիարքի իր լիազորությունները։ Նրա փոխարեն այդ լիազորությունները կատարում էր Արամ արքեպիսկոպոս Աթեշյանը, որն ընտրված էր ոչ թե համայնքի, այլ պետության կողմից:
2016թ.-ի հոկտեմբերի 26-ին Պոլսո Հայոց պատրիարքարանը հայտարարել է պատրիարք Մեսրոպ Մութաֆյանին անգործունյա ճանաչելու որոշման մասին, ինչը ենթադրում է նոր պատրիարքի ընտրության մեկնարկ, որի համար անհրաժեշտ էր նախ ընտրել Պոլսո Հայոց պատրիարքի նոր տեղապահ, որը կղեկավարեր ընտրական գործընթացը:
2017թ.-ի փետրվարին Էջմիածնում կայացված որոշման համաձայն՝ մարտի 15-ին Ստամբուլում տեղի ունեցավ Պոլսո Հայոց պատրիարքի նոր տեղապահի ընտրություն: Ընտրություններում Արամ արքեպիսկոպոս Աթեշյանին հաղթած Գարեգին արքեպիսկոպոս Բեկչյանը, չնայած Աթեշյանի ու պետության կողմից միջամտություններին, ստանձնեց Պոլսո Հայոց պատրիարքի տեղապահի պաշտոնը և արդեն ձեռնամուխ է եղել պատրիարքի ընտրությունների կազմակերպմանը։