Ўзбекистон Қаҳрамони Николай Кучерский вафот этди
Ўзбекистон Қаҳрамони, кон-металлургия тармоғи фахрийси, Навоий кон-металлургия комбинатининг собиқ Бош директори Николай Иванович Кучерский 81 ёшида вафот этди.
Бу борада мамлакат раҳбарияти, жумладан, президент Шавкат Мирзиёев ва Бош вазир Абдулла Арипов имзолаган таъзия ЎзА томонидан 14 декабрда эълон қилинди.
Таъзияномада айтилишича, Николай Кучерский 1937 йили Украинада туғилган. 1961 йилда Днепропетровск кончилик институтини тоғ-кон муҳандиси мутахассислиги бўйича битирган. Шу йили Учқудуқ шаҳрида тоғ устаси сифатида меҳнат фаолиятини бошлаб, участка бошлиғи, карьер бошлиғи, бош муҳандис, сўнг Марказий руда бошқармаси директори лавозимларида ишлади.
1985 йилда Навоий кон-металлургия комбинатининг Бош директори этиб тайинланди.
Техника фанлари доктори, Ўзбекистонда хизмат кўрсатган муҳандис, Навоий давлат кончилик институти ва Тошкент автомобиль йўлларини лойиҳалаштириш, қуриш ва фойдаланиш институтининг фахрий профессори Н.Кучерский катта илмий-тадқиқот ишлари олиб борди. У 150 га яқин илмий иш, 14 ихтиро муаллифидир.
Н.Кучерский Олий Мажлис депутати этиб сайланган, Ўзбекистон Республикаси Олий Мажлиси Сенати аъзоси эди.
“Н.Кучерскийнинг Ўзбекистон мустақиллигини мустаҳкамлаш, тоғ-металлургия саноатини жадал ривожлантиришга қўшган ҳиссаси давлатимиз томонидан муносиб тақдирланган. 1996 йилда унга олий мукофот – "Ўзбекистон Қаҳрамони" унвони берилди. Шунингдек, у "Эл-юрт ҳурмати" ва "Дўстлик" орденлари билан мукофотланган.
Ишлаб чиқариш соҳасининг йирик ташкилотчиси, олим, меҳрибон устоз Николай Иванович Кучерский хотираси қалбларимизда ҳамиша сақланиб қолади”, дейилади таъзияномада.