Այն ներկրվող ապրանքները, որոնք Հայաստանում աճեցվում են, լրիվ հնարավոր է փոխարինել տեղականով. Վազգեն Սաֆարյան
Այն ներկրվող ապրանքները, որոնք Հայաստանում աճեցվում են, լրիվ հնարավոր է փոխարինել տեղականով: Tert.am-ի հետ զրույցում նման կարծիք հայտնեց Հայրենական ապրանք արտադրողների միության նախագահ Վազգեն Սաֆարյանը՝ անդրադառնալով վարչապետ Կարեն Կարապետյանի հայտարարությանը: Հիշեցնենք, որ կառավարության նիստում վարչապետը հանձնարարել էր գյուղատնտեսության ոլորտում ներկրվող ապրանքները փոխարինել տեղականով։
-Պարո՛ն Սաֆարյան, հնարավո՞ր է ներկրվող գյուղ ապրանքներն ամբողջությամբ փոխարինել տեղականով:
- Այն ապրանքները, որոնք Հայաստանում աճեցվում են, լրիվ հնարավոր է փոխարինել, բայց այն ապրանքները, որոնք այստեղ չեն աճում, բնականաբար, պետք է ներմուծվեն: Հայտարարությունը վերաբերում է նրանց, որոնք տեղում են արտադրվում:
- Հայաստանի տնտեսության համար ո՞րն է ավելի ձեռնտու:
- Իհարկե, շուկայում տեղական ապրանքների իրացումը: Նախ՝ համային առումով, երկրորդն էլ՝ մեր տեղականը կխթանենք. գնելով նրա ապրանքը՝ զարգացման հնարավորություն ենք ստեղծում նրա համար: Բոլոր դեպքերում, տեղական շուկայի պաշտպանությունը հօգուտ տեղական արտադրողի է:
-Եթե այս կերպ զարգացման հնարավորություններ են ստեղծվում տեղական արտադրողի համար, ինչո՞ւ այս հանձնարարականը հիմա է տրվում, ինչո՞ւ նախկինում չէր արվել:
– Նրա համար, որ մեր շուկան նեիտրալիզացված է: Բացի դրանից՝ մենք առևտրի համաշխարհային կազմակերպությանն անդամագրված ենք, և այս իմաստով, դրսից բերվող ապրանքների համար որոշ արտոնություններ լինում են: Բայց ելնելով վերջին իրադարձություններից, մասնավորապես՝ ադրբեջանական խնձորի հետ կապված դեպքը, այս խնդիրը լուծվել է հօգուտ տեղական արտադրողների:
-Որպեսզի տեղական արտադրողը կարողանա այնքան մեծացնել իր արտադրության ծավալները, որ ներքին շուկային ամբողջությամբ բավարարի, պետության կողմից ի՞նչ աջակցություն պետք է ցուցաբերվի:
– Պետք է գյուղացուն էժան վարկեր տրվեն, կոոպերացիաներ ստեղծվեն, որ գյուղացուն օգնեն իր ապրանքն իրացնել և մեծածախ առևտրի շուկաներ ստեղծվեն:
- Մոտ ժամանակներում հնարավոր համարո՞ւմ եք այս հայտարարությունը կյանքի կոչելը:
– Դե գիտեք, ցանկացած երկար ճանապարհ սկսվում է առաջին քայլից: Այդ քայլն արվում է, և դա ողջունելի է: