ԱՀԿ-ն կարող է արգելել բարակ ծխախոտները
Առողջապահության համաշխարհային կազմակերպությունը (ԱՀԿ) կարող է արգելք սահմանել բարակ ծխախոտների համար, գրում է «Կոմերսանտ»-ը` մանրամասնելով, որ տվյալ հարցը կարող է քննարկվել ծխախոտի դեմ պայքարի համաժողովի ժամանակ:
Հայտնի է, որ համաժողովը կայանալու է նոյեմբերի սկզբին` հնդկական Դելիում: Միջոցառման մասնակից աշխատանքային խմբերից մեկի նախապատրաստած զեկույցի նյութերում առաջարկվում է արգելք սահմանել կամ էլ սահմանափակել ծխախոտի այն դիզայներական լուծումները, որոնք գրավում են գնորդներին:
Նմանատիպ դիզայներական լուծումների շարքին են դասվում ծխախոտների slims, super slims, ultra slims ձևերը:
«Հետազոտությունների արդյունքները վկայում են, որ ծխախոտի դիզայնի առանձնահատկությունները կարող են ծխողներին ու պոտենցիալ գնորդներին թյուրիմացության մեջ գցել, ներազդել նրանց կողմից ծխախոտի օգտագործման, դրա նկատմամբ վերաբերմունքի ու գիտելիքների վրա»,-նշվում է զեկույցում: