Բայդենը Նասրալլահի հետ պատահածը «արդար» է որակել
ԱՄՆ նախագահ Ջո Բայդենը մեկնաբանել է Իսրայելի ավիահարվածից լիբանանյան «Հեզբոլլահ» շարժման առաջնորդ Հասան Նասրալլահի զոհվելը:
«Հասան Նասրալլահը և նրա գլխավորած ահաբեկչական խմբավորումը՝ «Հեզբոլլահ»-ը, պատասխանատու են չորս տասնամյակ ահաբեկչության ընթացքում հարյուրավոր ամերիկացիների սպանության համար: Իսրայելի ավիահարվածից նրա մահը արդարության միջոց է նրա բազմաթիվ զոհերի, այդ թվում հազարավոր ամերիկացիների և իսրայելցիների համար:
Հարվածը, որը սպանեց Նասրալլահին, հասցվել է 2023 թվականի հոկտեմբերի 7-ին ՀԱՄԱՍ-ի սպանդով սկսված հակամարտության ավելի լայն համատեքստում: Հաջորդ օրը Նասրալլահը ճակատագրական որոշում կայացրեց՝ միավորվել ՀԱՄԱՍ-ի հետ և բացել, իր բնորոշմամբ, «հյուսիսային ճակատ» Իսրայելի դեմ:
Միացյալ Նահանգները լիովին պաշտպանում է Իսրայելի իրավունքը՝ պաշտպանվելու «Հեզբոլլահ»-ից, ՀԱՄԱՍ-ից, հութիներից և Իրանի կողմից աջակցվող ցանկացած այլ ահաբեկչական խմբավորումներից: Հենց երեկ ես պաշտպանության նախարարին հանձնարարել եմ էլ ավելի ամրապնդել ԱՄՆ-ի բանակի պաշտպանական դիրքերը Մերձավոր Արևելքի տարածաշրջանում՝ զսպելու ագրեսիան և նվազեցնելու ավելի լայն տարածաշրջանային պատերազմի վտանգը», - նշել է Բայդենը:
Նշենք, որ «Հեզոլլահ»-ը պաշտոնապես հաստատել է գլխավոր քարտուղար Հասան Նասրալլահի զոհվելը սեպտեմբերի 27-ին Բեյրութում «Հեզոլլահ»-ի կենտրոնակայանի վրա Իսրայելի թիրախային ավիահարվածի հետևանքով։