Պոմպեոն Իրաքի վարչապետի պաշտոնակատարի հետ քննարկել է ԱՄՆ դիվանագետների և օբյեկտների պաշտպանության հարցը
ԱՄՆ պետքարտուղար Մայք Պոմպեոն հեռախոսազրույցի ընթացքում Իրաքի վարչապետի պաշտոնակատար Տյաուֆիկ Ալյաուի հետ քննարկել է մերձարևելյան երկրում ամերիկացի դիվանագետների և ամերիկյան օբյեկտների պաշտպանության հարցը, հայտնել է Պետդեպարտամենտը, գրում է france24-ը:
Մերձավոր Արևելքում իրավիճակը թեժացել է դեկտեմբերի վերջին՝ Սիրիայում և Իրաքում շիա «Կատաիբ Հեզբոլլահ»-ի օբյեկտների ուղղությամբ ամերիկյան զորքերի հարվածից հետո: Դրանից հետո շարժման կողմնակիցները սկսել են Բաղդադում ամերիկյան դիվանագիտական առաքելության վրա գրոհը, իսկ հետո Վաշինգտոնի հատուկ գործողության ընթացքում զոհվել են իրանցի գեներալ Ղասեմ Սոլեյմանին և իրաքյան շիա աշխարհազորի փոխղեկավար Աբու Մահդի ալ Մուհանդիսը: ԱՄՆ-ն նրանց մասնակից է համարում դեսպանատան գրոհի կազմակերպմանը:
«Պետքարտուղարն ընդգծել է Իրաքի պատասխանատվությունը դիվանագետների, ամերիկյան և կոալիցիոն ուժերի և օբյեկտների պաշտպանության համար», - ասված է Պետքարտուղարության հաղորդագրության մեջ:
Նշվում է, որ պետքարտուղարն ու վարչապետի պաշտոնակատարը քննարկել են նաև Իրաքում արտահերթ ընտրությունների թեման, իրաքյան քրդերի հետ հարցերի կարգավորումը, շիա բնակչության իրավունքների պաշտպանությունը, բարեփոխումները, ժողովրդավարության ամրապնդումը և ցուցարարների իրավունքների պաշտպանությունը:
Շաբաթ օրը քաղաքական գործիչ և Իրաքի շիա բնակչության հոգևոր առաջնորդ Մուքթադա աս-Սադրը սպառնացել է Բաղդադի փողոցներ դուրս բերել իր միլիոնավոր կողմնակիցներին, եթե խորհրդարանը հաջորդ շաբաթ չքվեարկի Ալյաուիի կառավարության օգտին: Ալյաուին խորհրդարանին կոչ է արել փետրվարի 24-ին վստահության հարցով քվեարկություն անցկացնել իր ձևավորած կառավարության նկատմամբ: Նա խոստացել է, որ իր կառավարության հաղթանակից անմիջապես հետո իր կառավարությունը կսկսի ցուցարարների և ուժայինների սպանությունների հետաքննությունը, ինչպես նաև ազատ կարձակի «խաղաղ ցուցարարներին»: Նա նաև հայտարարել է, որ միջոցներ կձեռնարկվեն Իրաքում ազատ արտահերթ ընտրություններ անցկացնելու համար:
Իրաքում ցուցարարները 2019 թվականի հոկտեմբերի սկզբից շարունակվող բողոքի ակցիաների ընթացքում պահանջում են կառավարության հրաժարականը, կոռուպցիայի, գործազրկության դեմ պայքարը, կենսապայմանների բարելավում: Բողոքի ակցիաներին ուղեկցող բախումների և անկարգությունների հետևանքով զոհվել է ավելի քան 600 մարդ, տուժել է շուրջ 50 հազար մարդ: Դրանք ամենաընդգրկուն բողոքի ակցիաներն են, որոնք տեղի են ունեցել Իրաքում Սադամ Հուսեյնի տապալումից ի վեր: