Բարեփոխումները պետք է կյանքի կոչենք ոչ թե ուրիշների, այլ մեր երկրի հզորացման համար. Թևան Պողոսյանը՝ ԵՄ-ի հետ համաձայնագրի կյանքի կոչման մասին
Մեր առջև կանգնած ամենաառաջին խնդիրը, գլխավոր մարտահրավերներից մեկը ժողովրդագրության խնդիրն է, և հուսամ, որ նոր կառավարությունն իսկապես ընդունելու է դա. լրագրողների հետ զրույցում ասաց Մարդկային զարգացման միջազգային կենտրոնի նախագահ Թևան Պողոսյանը:
Նրա խոսքով՝ ներքաղաքական կյանքում հիմա ամենակարևոր խնդիրները լինելու են բարեփոխումների խնդիրները՝սկսած կառավարության կառուցվածքից:
«Ընդամենը 2-3 օր առաջ Եվրամիությունում համաձայնություն ձեռք բերվեց իրականացնել CEPA-ի արդիականացման օրակարգը: Այդ բարեփոխումները պետք է կարողանանք կյանքի կոչել, որովհետև ինչպես մինչև ստորագրումը, այնպես էլ հիմա, ասում ենք, որ այդ բարեփոխումները ոչ թե ուրիշների, այլ մեզ համար, մեր երկրի հզորացման համար ենք արել»,- ասաց Պողոսյանը:
Թևան Պողոսյանը կոչով դիմեց կառավարությանը՝ ուշադրություն դարձնել բարեփոխումների մանրունքներին, տեսլականին և նախքան ծրագրեր գաղափարներ ներկայացնելը միմյանց հետ հաղորդակցում ունենալ:
«Մենք սովոր ենք ասելու` եկեք այս հարցերը միասնական քննարկենք, հետո որոշենք, բայց այդ քննարկումը կցանկանայի վերածվեր ոչ թե, որ ամեն մեկն իր դիրքորոշումը ներկայացնի հեռանա, այլ լսեն և ընկալեն դիմացինին, որպեսզի բարեփոխումները դառնան բոլորինս, այլ պարագայում ունենալու ենք հին պատմությունը»,- ընդգծեց նա:
Անդրադառնալով ծխախոտի հարկի բարձրացմանն ու դիտարկումներին, թե դրանից բյուջե շատ գումար կգնա, Թևան Պողոսյանը նշեց, որ միգուցե մարդիկ կսկսեն քիչ ծխել կամ անորակը կծխեն: «Ամենատրամաբանականը լինելու է այն, որ կսկսեն անորակը ծխել և դրանով ավելի կվնասեն առողջությունը»,- ասաց նա և շեշտեց, որ դրա համար պետք է խնդրին տալ համակարգված լուծումներ, այլ ոչ թե մեկ օրվա համար լուծում:
Խոսելով Արցախյան հիմնահարցի մասին՝ Պողոսյանը նշեց, որ ամենակարևոր շեշտադրումը այն է, որ պետք է գիտակցել՝ պատերազմը չի ավարտվել: «Մենք պետք է մի բան գիտակցենք՝ մեր պատերազմը չի ավարտվել: Ադրբեջանը նույնն է, իր վարած քաղաքականությունը նույնն է: Այս ամենը հաշվի առնելով պետք է օգտագործենք բոլոր եղած հնարավորությունները՝ դիվանագիտական, բանակցային և այլն, բայց հարցը լուծվելու է իրական հողի վրա, իսկ իրական հողի վրա լուծվելու է այնպես, ինչպես ասել է Վազգեն Սարգսյանը՝ այս երկրի սահմանները գծվել են արյունով, բայց պետք է պահվեն քրտինքով: Այնպես, որ պետք է քրտնաջան աշխատել»,- ընդգծեց Պողոսյանը:
Ամալյա Առաքելյան