Սևանից ջրառի պատճառներն, ըստ Լ. Նազարյանի, ջրամբարների անբարվոք վիճակը, ահռելի կորուստներն ու ջրագողություններն են
Ազգային ժողովում մինչև 40 մլն խորանարդ մետր հավելյալ ջուր բաց թողնելու նախագծի քննարկմանը հարցի հարակից զեկուցող «Ելք» խմբակցության պատգամավոր Լենա Նազարյանը մի քանի պատճառ ներկայացրեց, թե ինչու ամեն տարի նույն խնդրով ԱԺ են գալիս և Սևանից հավելյալ ջուր խնդրում:
«Ի՞նչն է անցած տարվա և այս տարվա տարբերությունը: Անցյալ տարի միակ պատճառաբանությունն այն էր, որ ասում էին՝ անձրև չի եղել, ջրամբարներում ջուր չկա: Այս տարի ոլորտի պատասխանատուներից լսեցինք ոչ միայն եղանակի պատճառները, այլ նաև պատճառները, թե ինչու է տարեց տարի ջրի պաշարը նվազում»,-ասաց նա և թվարկեց պատճառները:
Ըստ Նազարյանի՝ 15 տարի շարունակ արարատյան արտեզյան ավազանից ջրառը նորմայից գերազանցել է 660 մլն խմ: Ըստ նրա՝ ջրամբարները բարվոք վիճակում չեն, և կան ահռելի կորուստներ: Պատճառ է նաև այն, որ համակարգում լինում են ջրագողություններ, եղել են և հիմա էլ կան: «Ջրային ռեսուրսի գողությունը նման վիճակի առաջ է կանգնեցրել, և մենք ստիպված նման լուծում պետք է տանք: Կառավարության դիրքորոշումն է, որ Սևանա լիճը ոռոգման ջրի տարա չէ, և ամեն ինչ պետք է անել, որ Սևանից ջրառ չանենք»,-ասաց նա:
Լենա Նազարյանն ասաց, որ ԱԺ հանձնաժողովը դրական եզրակացություն է տվել, քանի որ իսկապես կա անհրաժեշտություն՝ գյուղատնտեսական հողերը ոռոգելու: «Բայց խնդիրը պետք է այլ կերպ լուծվի, ոլորտում պետք է լինեն բացահայտումներ, և Սևանը օգտագործենք որպես կարևոր խմելու ջրի տարածաշրջանային ռեզերվ»,-ասաց նա: