Ասում են՝ բիզնեսով զբաղվեք. երկիրը՝ մանավանդ գյուղացիությունը պարտքերի մեջ է, ինչպե՞ս կարող է բիզնես անել. «Ֆերմերային շարժում» ՀԿ նախագահ
Գյուղատնտեսությամբ զբաղվողներին խիստ մտահոգում է որոշ ապրանքների սպասվող թանկացումը` այդ թվում թունաքիմիկատների, այս մասին Tert.am-ին հաղորդեց «Ֆերմերային շարժում» ՀԿ նախագահ Սարգիս Սեդրակյանը:
«Թունաքիմիկատների 40 տոկոս թանկացում կլինի: Մի ժամանակ բերում էին այստեղ ավելի մոտ տեղից՝ Ռուսաստանից, հիմա Չինաստանից են բերում, դրա պատճառով բավականին թանկ է» ,-ասաց նա:
Թունաքիմիկատների թանկացում լինելու է, որովհետև արտադրողների մոտ է թանկացում եղել. Tert.am-ի հետ զրույցում ասաց ագրոքիմիկատներ, գյուղատնտեսական և այգեգործական տեխնիկա ներմուծող ընկերության ներկայացուցիչը:
«Դեռևս չեն եղել, բայց սպասվում է: Տոկոսային չեմ կարող ասել, տարբեր ապրանք տարբեր չափով կթանկանա՝ կախված նաև հումքի արժեքից: Մենք հիմնականում Չինաստանից ենք ներմուծում»,-ասաց ներմուծող ընկերության ներկայացուցիչը:
«Ֆերմերային շարժում» ՀԿ նախագահ Սարգիս Սեդրակյանի խոսքով, դիզվառելիքի թանկացումն էլ գյուղատնտեսների համար լրջագույն խնդիր է և ազդելու է ապրանքի ինքնարժեքի վրա:
«Շատ էլ վարչապետն ասում է գյուղացու վրա չի ազդի, ո՞վ ասաց, որ չի ազդի վառելիքի թանկացումը: Ամբողջ վարը, ցանքը, բերքահավաքը տրակտորներով, կոմբայններով են անում, իսկ դրանք աշխատում են դիզվառելիքով, ո՞նց չի ազդի: Բա ինքնարժեքը, որ ձևավորվում է, այդ ծախսերը հետն է ձևավորվում»,-ասաց Սարգիս Սեդրակյանը:
Նա նշեց, որ հիմա գյուղացիական տնտեսություններ ունեցողներից շատերը պարտքերի մեջ են, մեծ թվով վարկեր ունեն:
«Հիմա, գիտեք ինչ, բոլորին ասում են՝ գնացեք բիզնեսով զբաղվեք, երկիրը, մանավանդ գյուղացիությունը հիմնականում պարտքերի մեջ է. հարկերի, վարկերի, տոկոսների մեջ, այդ մարդը ո՞նց կարող է բիզնես անել: Իմ ընկերներից մեկը մի 2 տարի առաջ գնաց Ռուսաստան, մի քիչ աշխատեց, իբր փող բերեց: Բերեցին մի 2, 3 անասուն առան, մի կերպ ոտքի էին կանգնում: Հիմա էս վերջերս, որ այդքան լիզինգից խոսեց վարչապետը, այդ տղան երկու ոտքը դրեց մի կոշիկի մեջ և ասեց՝ ես էլ եմ տրակտոր բերում: Տրակտորը բերեց ու մինչև հիմա տանը կռիվ է: Գործ այդքան չկա, ինքն էլ աշխատող տղա է, բայց ո՞նց պետք է անի, պետք է գյուղացին կանչի ասի՝ արի այսքան տեղը վարի, գյուղացին էլ փող չունի, որ դրա դիմաց տա: Հիմա չեն իմանում այդ բանկի պարտքերը ոնց փակեն»,-ասաց Սեդրակյանը:
Գյուղատնտեսական ոլորտի առաջնային խնդիրը, ըստ Սեդրակյանի, մեքենատրակտորային կայանների ստեղծումն է:
«Այն, որ ասում են լիզինգով տրակտոր առնենք, նախ չունի գյուղացին այդ հնարավորությունը՝ մեկ, երկրորդը, եթե Հայաստանում միջինը 1,2 հա հողատարածք է հասնում սեփականաշնորհման, դրա համար ի՞նչ իմաստ ունի գյուղացին ինչ-որ տրակտոր վերցնի: Պետությունը նախատեսել էր մեքենա-տրակտորային պարկերի ստեղծումը, ինքը ասում էր մասնավոր հատվածի հետ միասին, մի մասն էլ պետությունը միջազգային կառույցների գումարներով: Բայց, եթե մասնավոր հատվածը իմանա, որ վերջում բիզնեսը մնալու է իրեն, նոր կներդնի»,-ասաց Սեդրակյանը:
«Ֆերմերային շարժում» ՀԿ նախագահի խոսքով, այսօր Հայաստանում գյուղատնտեսությամբ զբաղվում է երկու խավ՝ գյուղացիությունը և օլիգարխիան:
«Օլիգարխիան, բնական է, կոպեկներով, ինչ-որ միջազգային դրամաշնորհների ծրագրերով ձեռք են գցել մեծ տնտեսությունների, շատ լավ այգիներ ունեն, շատ լավ ֆերմաներ ունեն, ջերմոցներ ունեն, բայց այդ խավը ոչ մի կապ չունի գյուղացիության հետ։ Իսկ գյուղացիների հիմնական մասը տոկոսների մեջ է, գնում Ռուսաստան, աշխատում են, որ այստեղի տոկոսները փակեն: Սարսափելի վիճակ է, ու գնալով վիճակն ավելի է վատանում»,-ասաց նա:
Անդրադառնալով գյուղմթերքի իրացման խնդրին՝ Սեդրակյանը նշեց, որ եթե գյուղատնտեսական ապրանքի ծավալը քիչ եղավ այս տարի, բնականաբար, թանկ կվաճառեն:
«Սերգո Կարապետյանը ժամանակին ասում էր՝ ինչքան կարող եք արտադրեք, մեծ շուկա կա, ԵԱՏՄ-ի շուկան: Ուրեմն ժողովուրդը, գյուղացիությունը ոգևորված սկսեցին մասնավորապես կարտոֆիլ արտադրել: Դեռ մեր շուկայում կարտոֆիլը չեղած, արդեն ռուսական կարտոֆիլը ավելի էժանով լցված էր մեր մոտ: Հիմա տարբեր տեղերից բերում են, թե հիմա որակը ինչ է, շա՞տ գիտեմ, ԳՄՕ-ներ են, ինչ են: Ապրանքային տեսքը նայում ես շատ հաջող է, բայց մեջը համ չկա»,-ասաց նա: