Апас бистәсе үзәген яңартуга 31 миллион сум акча бүленәчәк
Апас бистәсенең үзәк урамнарын ремонтлау һәм тәртипкә китерү өчен Татарстан бюджетыннан 31 миллион сум акча бүлеп биреләчәк. Шул хактагы мәгълүмат дәүләт сатып алулары сайтында урнаштырылган.
Эшләрнең заказчысы – «ТР Баш төзелеш идарәсе» дәүләт бюджет учреждениесе. Бистәнең Муса Җәлил, Кызыл Армия, Ленин, Кооператив һәм Завод урамнарын тәртипкә китерергә ниятлиләр. Барлыгы 117 мең квадрат метр юлга ремонт ясала.
Техник бирем нигезендә, бистә урамнары яшелләндереләчәк һәм яңа яктырткычлар куела. Шулай ук велосипед юлы һәм өстәл теннисы мәйданчыгы барлыкка килер дип көтелә. Моннан тыш, эшчеләр күзәтү мәйданчыгын да тәртипкә китерергә ниятли. Анда ятаклар, эскәмияләр урнаштырылачак, велопарковка барлыкка киләчәк.
Яңартылган иҗтимагый киңлек быелның 30 ноябреннән дә соңга калмыйча бистәне бизәп торырга тиеш.
Гаризалар тапшыру 28 апрельдә башланды, 12 майда аңа нәтиҗә ясала.
«Татар-информ» агентлыгы Татарстанда быелның ахырына кадәр 70кә якын яңа парк һәм сквер ачылачагы, шулай ук 960 ишегалды төзекләндереләчәге хакында элегрәк хәбәр иткән иде.