Миңнеханов Татарстанда тугыз кешене «Фидакарь хезмәте өчен» медале белән бүләкләде

Татарстанда тугыз кеше - эшчеләр, мастерлар, предприятие җитәкчеләре, мәдәният эшлеклеләре «Фидакарь хезмәте өчен» медале белән бүләкләнде. Бу карарны Татарстан Рәисе Рөстәм Миңнеханов имзалады.

«Татарстан Республикасы дәүләт заказы агентлыгы» АҖ генераль директорының беренче урынбасары Владимир Аксенов «Республикада социаль-икътисади сәясәтне гамәлгә ашыруга керткән өлеше өчен» бүләкләнде, «Казан федераль университеты» федераль дәүләт автономияле югары белем бирү учреждениесенең Чаллы институты электр энергетикасы һәм электр техникасы кафедрасы доценты Роберт Әхмәтшин «күпьеллык нәтиҗәле фәнни-укытучылык эшчәнлеге һәм югары квалификацияле белгечләр әзерләүгә зур өлеш керткәне өчен» медаль алды.

«Перспектива» ҖЧҖ директоры Әнис Гайнуллин, «Кама Тамагы гипс руднигы» АҖ өлкән машина йөртүче-экспедиторы Владимир Ермаков «республиканың төзелеш тармагы үсешенә зур өлеш керткән өчен» бүләкләнде.

Шулай ук «К.Тинчурин исемендәге Татар дәүләт драма һәм комедия театры» артисты Сәкинә Минханова, «Мотор төзелеше идарәсе» ҖЧҖ генераль директоры Бәһрам Мостафаев, Татарстан Республикасы Министрлар Кабинеты Аппаратының Төзелеш, транспорт, торак-коммуналь һәм юл хуҗалыгы идарәсенең юл һәм төзелеш комплексларында инвестиция программаларын гамәлгә ашыру бүлегенең баш киңәшчесе Айгөл Трофимова, профессор М.З.Сигал исемендәге республиканың онкодиспансеры 5нче онкология бүлегенең мөдире – табиб-онколог Ринат Хәмидуллин бүләккә лаек булды.

Миңнеханов икенче карар белән «КАМАЗ» ГАҖ генераль директорының сатып алулар буенча урынбасары Равил Ибраһимовны да шул ук медаль белән бүләкләде.

Искәртик, Татарстан Рәисе республикада өч кешегә машина төзелешенең атказанган хезмәткәре исемен биргән иде.