Махсус хәрби операциядә үз бурычларын үтәүчеләрне хуплап Аксубайда флешмоб оештырдылар
«Хыял» иҗат клубы коллективы Әлфия Рәхмәтуллина инициативасы һәм Аксубай үзәк район китапханәсе ярдәме белән махсус хәрби операция зонасында катнашучыларга ярдәм йөзеннән флешмоб оештырды.
«Хыял» күптән түгел оешты. Ул үз канаты астына биюгә һәм иҗади сәнгатькә гашыйк кешеләрне берләштерде. Клубта күбесенчә пенсионерлар катнаша. Ләкин анда урта яшьтәге кешеләр дә бар. Клуб җитәкчесе сүзләренчә, алар үз карашлары һәм хыяллары белән коллективка илһам бирә. Бу хакта «Авыл таңнары» сайтында хәбәр ителә.
«Без коллективка «Хыял» дип юкка гына исем бирмәдек. Анда махсус хәрби операция зонасына мобилизацияләнгән хәрбинең әтисе дә, шулай ук якыннары да бар. Шуңа күрә без Аксубай хәрбиләренә теләктәшлек белдереп, флешмоб оештырырга булдык», – дип сөйләде Әлфия Рәхмәтуллина.
Китапханә коллективы дәртле кешеләр белән хезмәттәшлек итүгә шат. Үзәк китапханә системасы директоры Ирина Телешева клубка чараны үткәрү өчен күптән түгел ачылган гаилә остаханәсен тәкъдим итте.