რუსეთმა ბრაზილია არ დაუშვა პრიგოჟინის თვითმფრინავის ჩამოვარდნის გამოძიებაში
მანამდე საავიაციო ინციდენტების კვლევისა და პრევენციის ბრაზილიურმა ცენტრმა (CENIPA) სახელმწიფოთაშორის საავიაციო კომიტეტს მიმართა თხოვნით ბრაზილიური კომპანია Embraer-ის მიერ წარმოებული ლაინერის კატასტროფასთან დაკავშირებულ გამოძიებაში მონაწილეობის თაობაზე, რათა მომავალში თავიდან იქნეს აცილებული მსგავსი ინციდენტები.
სახელმწიფოთაშორისმა საავიაციო კომიტეტმა მოიხმო სამოქალაქო ავიაციის საერთაშორისო ორგანიზაციის წესები, რომელთა თანახმად, თუკი საგანგებო შემთხვევა მოხდა შიდა რეისზე, ასეთ დროს მასზე არ ვრცელდება საერთაშორისო ნორმა.
რუსეთი არ არის ვალდებული, დათანხმდეს გამოძიებაში ბრაზილიის მონაწილეობას, მაგრამ, როგორც ექსპერტთა ნაწილი მიიჩნევს, მან ეს უნდა გააკეთოს, რათა გაფანტოს აშშ-ისა და ზოგიერთი სხვა ქვეყნის ეჭვები, რომ კრემლი დგას პრიგოჟინის თვითმფრინავის, Embraer Legacy 600-ის ჩამოვარდნის უკან. ცნობილია, რომ ამ მოდელის თვითმფრინავს უსაფრთხოების კარგი მაჩვენებლები აქვს.
23 აგვისტოს ტვერის რეგიონში ჩამოვარდა კერძო თვითმფრინავი, რომელსაც კერძო სამხედრო კომპანია „ვაგნერის“ დამფუძნებელი და ხელმძღვანელი ევგენი პრიგოჟინი იყენებდა. დაიღუპა მასში მყოფი ათივე ადამიანი, მათ შორის პრიგოჟინი და დაქირავებულ მებრძოლთა რამდენიმე მეთაური.