იაკობ ქაჯაია ოლიმპიადის ფინალშია
ვლადიმერ გეგეშიძის გუნდის უმძიმესმა წევრმა ოლიმპიურ ხალიჩაზე სამი შეხვედრა ჩაატარა, სამივე მოიგო და ჩემპიონის ტიტულს ერთი გამარჯვება აშორებს.
დილის პროგრამაში ქაჯაიამ ფინელი ელიას კუსმანენი და რუსეთის ოლიმპიური კომიტეტის გუნდის წევრი სერგეი სემიონოვი ჩამოიშორა. ნახევარფინალში კი ჩილეს სახელით მოჭიდავე კუბელს - იასმანი აკოსტა ფერნანდესს აჯობა.
ხვალ გასამართ საჩემპიონო ბრძოლაში ქართველი მძიმეწონოსნის მეტოქე იქნება თანამედროვე მსოფლიო ჭიდაობის ლიდერი, ოლიმპიური თამაშების სამგზის და მსოფლიოს ხუთგზის ჩემპიონი, კუბელი მიხაინ ლოპეს ნუნიესი.