Чаллыда Газа секторында яшәүчеләргә гуманитар йөк җыя торган ике нокта эшли
Чаллыда Газа секторында яшәүчеләргә гуманитар йөк формалаштыру өчен кирәкле товарлар җыялар. Шәһәрдә йөк җыя торган ике нокта эшли: «Орион» яшьләр үзәге (50нче комплекс, 18а) һәм «Нур» яшьләр үзәге (1нче комплекс, 2).
Искәртик, Казанда 3 ноябрьдән бирле гуманитар ярдәмне өч адрес буенча җыялар. Татарстанда яшәүчеләр зур булмаган әйберләрне «Ярдәм янәшә!» хәрәкәте офисына (Патрис Лумумба урамы, 4, 112нче бүлмә), ә зур әйберләрне Мәҗит Гафури урамы, 46 адресы буенча китерә ала. Шулай ук «Зәкят» (Казан, Тукай урамы, 89) хәйрия фонды да ярдәм җыя.
Кирәкле товарлар һәм азык-төлек исемлеге Татарстан мөселманнары Диния нәзарәте һәм «Кызыл ай» фонды тарафыннан билгеләнгән. Аңа балалар ризыклары (срогы бер айдан да ким булмаска тиеш), өлкәннәр өчен азык-төлек, гигиена чаралары һәм балалар кирәк-яраклары, көнкүреш әйберләре керә. Тулы исемлек белән ярдям.рф сайтында танышырга була.
Республика Хөкүмәтенә Израиль армиясе гамәлләреннән зыян күргән Газа секторында яшәүчеләргә гуманитар ярдәм җыюны оештырырга Татарстан Рәисе Рөстәм Миңнеханов йөкләде.