Татарстан командасы Истанбулда Ислам дөньясы илләре шеф-поварлары кубогы өчен көрәшәчәк
Ноябрь ахырында Татарстан аш-су осталары Истанбулга Ислам дөньясының шеф-поварлары кубогына барачак, анда татар ашлары турында сөйләячәкләр. Бу хакта «Татар-информ»га Татарстан Рестораторлар һәм отельерлар ассоциациясе президенты Зөфәр Гаязов хәбәр итте.
«Казанда «Россия - Ислам дөньясы» форумының кулинар конкурсында безнең пешекчеләр иң яхшылары булды. Шуннан соң Татарстан Рәисе Рөстәм Миңнеханов белән без Истанбулдагы форум кысаларында татар ашлары турында алга таба да сөйләргә теләвебез турында әңгәмә кордык. Безне хупладылар, 22 ноябрьдә анда барырга планлаштырабыз», - дип сөйләде әңгәмәдәш.
Конкурста Татарстан җыелма командасы бөтен ил данын яклаячак. Гаязов сүзләренчә, делегация берьюлы ике әләм алып бара.
Команда составына төрле юнәлешләр пешекчеләре, шул исәптән кондитерлар, шеф-поварлар һәм башкалар керәчәк.