Алабуга районы үз хәрбиләренә 500 тоннадан артык гуманитар ярдәм җибәрде

Алабугадан гуманитар ярдәмнең чираттагы партиясе Лисичанск һәм Рубежное шәһәрләрендә яшәүчеләргә җибәрелде. Алабуга районы үз хәрбиләренә 500 тоннадан артык гуманитар ярдәм җибәрде. Бу хакта «Алабуга нуры» хәбәр итә.

Гуманитар ярдәм җыю буенча штаб җитәкчесе Роман Епанешников сөйләвенчә, һәр 1-2 ай саен бер машина йөк җибәрелә. Башта ул Казанга, аннан үз адресатларына юл тота.

— Март аенда бу шәһәрләрнең гади халкына ярдәм итә башлавыбызга ике ел була инде. Сезонга яраклы киемнәр, медикаментлар, көнкүреш химиясе һәм шәхси гигиена чаралары җыябыз. 1 сентябрьгә портфельләр, мәктәп өчен кирәк-яраклар әзерләнде. 300ләп рюкзак җибәрдек. Төп өлешне штабка әйберләр алып килүче алабугалылар кертә. Гомумән алганда, бу вакыт эчендә тыныч халыкка 35 тоннадан артык гуманитар ярдәм җибәрелде, — ди ул.

Роман шәхсән үзе Лисичанскида май башында «Бердәм Россия Яшь гвардиясе» составында булган һәм ярдәмгә мохтаҗ өлкәннәрне һәм балаларны күргән.

— Без анда Җиңү көненә багышланган чаралар үткәрдек, Георгий тасмалары тараттык. Балаларга канцелярия товарлары бирдек, татлы мамык белән сыйладык, өлкәннәргә исә кием-салым, азык-төлек, ярмалар тапшырылды. Һәркем ярдәмне рәхмәт әйтеп кабул итте, аларны катнаш хисләр биләп алган иде: бер үк вакытта еладылар да, шатландылар да. Аларга бу шартларда яшәү, әлбәттә, җиңел түгел, — дип сөйләде алабугалы.

Шулай да гуманитар штабның төп юнәлеше безнең хәрбиләргә ярдәм итү булып кала. «Барс» яшьләр үзәгендә урнашкан остаханәдә маскировкалау челтәрләре үрелә, башлык-нашлемниклар, шәмнәр ясала, «пятиточечник»лар тегелә, гуманитар ярдәм җыю бара, соңыннан барысы да якташларга җибәрелә. Шундый ук эшне волонтерлар шәһәрдә һәм районда урнашкан башка пунктларда да алып бара.