Түбән Камада эшкәртелгән пластиктан пандуслар барлыкка киләчәк
Түбән Каманың мәгариф учреждениеләрендә пластик җыю өчен дүрт фандомат урнаштырылган. Алга таба җыелган чималдан шәһәрнең аз хәрәкәтләнүче гражданнары өчен пандуслар ясалачак. Проектны «Экотехнологияләр» компаниясе СИБУРның «Яхшы эшләр формуласы» социаль инвестицияләр программасы ярдәме белән гамәлгә ашыра. Бу хакта Түбән Кама муниципаль районы рәсми сайтында хәбәр ителә.
Фандоматлар шәһәрнең дүрт белем бирү учреждениесендә урнашкан: Түбән Кама химия-технология институтында, 24 нче лицей-интернатта, «Адымнар» полилингваль гимназиясендә һәм Балалар экология-биология үзәгендә. Эшкәртү өчен 1 PET тамгасы белән ике литрлы эчемлекләрдән пластик шешәләр, шулай ук 2 HDPE тамгасы белән көнкүреш химиясе флаконнарын тапшырырга мөмкин. Җыелган чимал полимер комлы композитны кушып, пандуслар ясау өчен кулланылачак. Чимал җыю яңа уку елында да дәвам итәчәк.
Түбән Камада Россиядә иң зур челтәрләрнең берсе булган Bottle Bank фандоматлары эшләячәк, ул 18 төбәктә 200 фандоматны берләштерә.
Тапшырылган икенчел чимал өчен баллар бирелә, аларны лояльлек программасы партнерларыннан отышлы тәкъдимнәргә (ташламаларга, бонусларга, акцияләргә) алыштырырга мөмкин. Балларны шәхси кабинетта авторизацияләнгәннән соң, сайтта алыштырырга була.
«Бу проект Түбән Камада аерым пластик җыю инфраструктурасын үстерүгә һәм файдалы экогадәтләрне популярлаштыруга юнәлдерелгән СИБУР инициативасын дәвам итә. Элегрәк предприятие ярдәме белән сигез фандомат җирле мәктәпләрдә барлыкка килгән иде. Урнаштыру урыны очраклы сайланмаган: яшьләрне, балаларны һәм аларның ата-аналарын җәлеп итәргә телибез. Моннан тыш, яңа проект түбәнкамалыларга әйләнә-тирә мохитне саклауга үз өлешләрен кертергә һәм шәһәрнең инклюзив мохитен үстерүдә катнашырга мөмкинлек бирә», - диде «Яхшы эшләр формуласы» программасы җитәкчесе Елена Снежко.