Россия Герое Ирек Мәгъсүмовның әнисенә Мамадышта медаль тапшырылды

Татарстанның Мамадыш районында яшәүче Нәзирә Мәгъсүмова медаль белән бүләкләнде. Бу хакта «Татар-информ»га районның матбугат хезмәтендә хәбәр иттеләр.

Искәртеп үтәбез, Нәзирә Мәгъсүмова Россия Герое исеменә лаек булган подполковник Ирек Мәгъсүмовның әнисе. Бүләкне Мамадыш егетенә Президент Владимир Путин үзе тапшырды.

Бу яңалык Ирек Мәгъсүмовның туган ягына килеп җитү белән Мамадыш районы башлыгы Анатолий Иванов Мәгъсүмовлар гаиләсенә котлау телеграммасы юллады.

«Хөрмәтле Ирек Илдус улы! Сезне Россия Федерациясе Герое исеменә лаек булуыгыз белән чын күңелдән котлыйм! Мамадыш районы халкы Сезнең белән горурлана!» – дип әйтелә документта.

Геройның әнисенә туган ягы Мамадышта күпьеллык хезмәте, мәдәният өлкәсендәге казанышлары һәм герой тәрбияләгәне өчен рәхмәт белдерделәр. Район башлыгы Анатолий Иванов аны Мамадыш муниципаль районының «Фидакарь хезмәт өчен» медале белән бүләкләде. Бүләкләү тантанасы «Солдат хаты» хәйрия концерты вакытында узды.

Нәзирә Мәгъсүмова Мамадышта композитор Яруллиннар исемендәге сәнгать мәктәбендә 33 ел хезмәт куйган һәм хәзер дә шунда эшли.

Исегезгә төшерәбез, 2 августта Мәскәү Кремленең Екатерина залында Ирек Мәгъсүмов «Алтын Йолдыз» медале белән бүләкләнде, аңа Россия Герое исеме бирелде. Подполковник Казанның танк училищесында белем алган булган. Махсус хәрби операция башыннан ук Ирек Мәгъсүмов хәрби хәрәкәтләр зонасында. Россия «Отважные» гаскәрләре төркеме составында Лисичанск бәрелешендә катнашкан.

Мамадышта герой хөрмәтенә аның исеме белән бер урамны атау, ул укыган мәктәп янында бюст һәм монумент урнаштыру планлаштырыла.

2002 елда Нәзирә ханымың ире авырудан вафат булган. Нәзирә Мәгъсүмова улын ялгыз тәрбияләп үстергән.