Чувашия Диния нәзарәте «Чувашия энҗеләре» фестивалендә катнашучыларны бүләкләде
Чувашия мөфтиенең беренче урынбасары Ильяс хәзрәт Сафиянов Чабаксар шәһәрендә узган «Чувашия энҗеләре» балалар иҗаты ачык фестиваль-бәйгесендә катнашучыларны бүләкләде. Бу хакта Россия мөселманнары Дини җыены Үзәкләштерелгән дини оешмасының матбугат хезмәте хәбәр итә.
Чабаксарда узган фестиваль-конкурсның гала-концерты Россиядәге Педагог һәм остаз елына, Чувашиядәге Бәхетле балачак елына багышланган.
Балалар иҗат бәйрәме Чуваш дәүләт курчак театрында тамашачыларның тулы залын җыйган. Өч сәгать дәвамында фестиваль финалына узган конкурсантлар чыгыш ясаган. Фестивальдә катнашучыларны, оештыручыларны һәм кунакларны шулай ук шагыйрь Юрий Энтин сәламләгән. Чыганак хәбәр иткәнчә, аны Чувашиянең яшь талантлары белән күптәнге дуслык бәйли.
Быел фестивальдә конкуренция бик җитди булган. Бәйгедә республиканың 20 муниципалитетыннан 1200дән артык бала катнашкан. Зона сайлап алу этаплары 4 шәһәрдә узган. Жюри балалар коллективлары һәм башкаручыларның 400ләп чыгышын бәяләгән. Иң яхшы дип табылган 27 номер гала-концерт программасына кертелгән. Яшь талантлар үзләрен вокаль, хореографик һәм инструменталь жанрларда сынаган.
«Чувашия энҗеләре» фестиваленең гимнына әверелгән Юрий Энтин сүзләренә «Дорогою добра» җыры яшь талантлар белән очрашуда зур рәхәтлек бирде, дип хәбәр итә чыганак. Гала-концертта катнашучыларга дипломнар һәм истәлекле бүләкләр тапшырылган.