KazanForum кысаларында «Хатын-кыз карашы» трегы ачылды
Бүген «Россия - Ислам дөньясы: KazanForum 2023» XIV Халыкара икътисади форумы кысаларында «Хатын-кыз карашы» трегы ачылды. Трекның игътибар үзәгендә традицион гаилә һәм әхлакый кыйммәтләрне саклау һәм популярлаштыру, ана һәм баланы яклау, хәйриячелекне үстерү һәм җәмгыятьтә яхшы мөнәсәбәтләрен ныгыту мәсьәләләре тора. Трекне ТР Дәүләт Советының хатын-кыз депутатларының «Мәрхәмәт-Милосердие» берләшмәсе әгъзалары оештырды.
«Хатын-кыз карашы» киң күләмле трегы традицион Казан форумы кысаларында быел беренче тапкыр уза. Ул тугыз мәйданчыктан тора, анда дөньяның утызга якын иленнән танылган чит ил спикерлары катнаша.
«Бүген монда актив хатын-кызлар, бизнес вәкилләре җыелды, аларны кешеләргә ярдәм итү, актуаль социаль мәсьәләләрне хәл итү һәм җәмгыятькә файдалы булу теләге берләштергән», - диде «Мәрхәмәт-Милосердие» хатын-кыз депутатлар берләшмәсе җитәкчесе, Россия кооперация университеты ректоры Алсу Нәбиева.
«Бүген без, хатын-кызлар, киң күләмле бизнес-проектларны гамәлгә ашырабыз, шул ук вакытта традицион кыйммәтләрне саклап калырга тырышабыз», - диде ул.
Алсу Нәбиева «Хатын-кыз карашы» трегын оештыруда актив ярдәм иткән барлык хезмәттәшләренә, «Мәрхәмәт-Милосердие» оешмасы әгъзаларына, Татарстан һәм Россия башкарма хакимияте органнары җитәкчеләренә, Россия Мөфтиләр шурасы каршындагы Хатын-кызлар хезмәттәшлеге ассоциациясе әгъзаларына, Россия-Гарәбстан эшлекле советы, Евразия хатын-кызлар форумы әгъзаларына рәхмәт белдерде. Әлбәттә, мондый трекны оештыру Татарстан Республикасы Рәисе Рөстәм Миңнеханов ярдәменнән башка мөмкин булмас иде.
«Без трекның ел дәвамында дәвам итәчәк интенсив нетворкингка старт бирүен бик теләр идек», - дип йомгаклады Алсу Нәбиева.